ओलीसँग सहमति नभए बहुमतबाट हटाउने प्रचण्ड-माधव नेपालको तयारी

१२ साउन, काठमाडौं । प्रधानमन्त्री तथा नेकपाका प्रथम अध्यक्ष केपी शर्मा ओलीसँग सहमति नभए बहुमतीय प्रक्रियाबाट अघि बढ्ने दोस्रो अध्यक्ष प्रचण्डले तयारी गरेका छन् । वरिष्ठ नेता माधवकुमार नेपाल पक्षसँग मिलेर बहुमतीय प्रक्रियाबाटै अघि बढ्ने र ओलीलाई ‘लाईन’मा ल्याउने प्रचण्डको तयारी रहेको नेताहरुको भनाई छ ।

स्थायी कमिटी बैठक भोलिका लागि तय भएपनि ओलीले फेरि स्थगित गर्ने वा बैठकमा सहभागिता नजनाउने समस्या कायमै छ । यस्तो बेला अब पार्टीको बहुमतले गर्ने निर्णयलाई अघि सार्ने प्रचण्डको तयारी छ । जसले ओलीका लागि फेरि सत्ता संकट बल्झिने छ भने उस्तै परे कुर्सी त्याग गर्नुपर्ने अवस्था पनि आउन सक्नेछ ।

भोलिको स्थायी समिति बैठकको तयारीका लागि बालुवाटारमा ओली र खुमलटारमा प्रचण्डको आन्तरिक बैठक चलिरहेको छ । जति नै आन्तरिक रणनीति बनाएपनि त्यसले पार्टीलाई निकास दिन सकेको छैन । सोहीकारण अब पार्टीको बहुमतको निर्णयबाट अघि बढ्ने निष्कर्षमा प्रचण्ड पुगेकाे नेताहरुको दाबी छ ।

यद्यपि यसका लागि आज र भोलि बिहान फेरि ओलीसँग निर्णायक छलफल गर्ने तयारी प्रचण्डको छ । सहमतिका लागि अझै पनि केही एजेन्डामा छलफल गर्ने तयारी छ । तर अब सहमतिका लागि त्यो सम्भावना अब कम रहेको प्रचण्ड–माधव नेपाल पक्षका नेताहरुको भनाई छ ।

ओलीले कुनै हालतमा प्रधानमन्त्री र अध्यक्ष पद नछाड्ने भएपछि अब बाध्य भएर बहुमतको निर्णयमा जानुपर्ने निष्कर्षमा खुमलटार पुगेको हो । जसले नेकपाभित्रको आन्तरिक संघर्ष फेरि एकपटक उत्कर्षमा पुग्ने संकेत देखिएको छ ।

यसअघि ओलीले प्रचण्डलाई आगामी मंसिरमै महाधिवेशन गरेर एकल अध्यक्ष बनाउने प्रस्ताव गरेका थिए । शुरुमा ओलीको यो प्रस्ताव मानेका प्रचण्ड माधव नेपालको दबाबपछि ओलीसँगको सहमतिबाट पछि हटेका थिए । जसले नेकपाभित्र झन कलह ल्याएको छ ।

अब ओलीलाई एकैपटक बहमुतीय प्रक्रियाबाट निर्णय गरेर प्रधानमन्त्री वा अध्यक्ष पदबाट हटाउने तयारी प्रचण्ड–माधव नेपाल पक्षको छ । यसका लागि खुमलटारमा छलफल भइरहेको प्रचण्डनिकट एक नेताले जानकारी दिएका छन् ।