अब भोट माग्न घर घर जानुपर्ने निर्वाचन प्रणाली फेरौ !

१२ साउन, काठमाडौं । वर्तमान निर्वाचन प्रणाली निकै महंगो भएको भन्दै सांसदहरुले तत्कालै यसलाई फेर्नुपर्ने माग गरेका छन् । यो अवस्था नफेरिए भोलिका दिनमा झन महंगो बन्ने चुनावले भ्रष्टाचार बढ्ने नेता तथा सांसदहरुको चिन्ता छ ।

सोमबार बसेको राज्य व्यवस्था तथा सुशासन समितिको बैठकमा बोल्दै उनीहरूले निर्वाचन प्रणाली नफेपरिएसम्म देशको विकास नहुने पनि बताएका छन् । प्रत्यक्ष निर्वाचन प्रणाली खर्चिलो र समानुपातिक प्रणालीमा नातावाद हावी भएकाले अहिलेका विकृति मौलाएको सांसदहरुको भनाई छ ।

निर्वाचन आयोगको वार्षिक प्रतिवेदनमाथिको छलफलमा सहभागी नेकपाकी सांसद पम्फा भुसालले मिश्रित निर्वाचन प्रणालीमा विकृति देखापरेको बताइन् । समानुपातिकबाट निर्वाचित सांसदहरूलाई विभेद हुने गरेको महसुस भएको भन्दै उनले शीर्ष नेताहरुलाई समानुपातिकमा आउन सुझाव दिइन् ।

कांग्रेस सांसद देवेन्द्रराज कंडेलले चुनावी प्रचारमा घरदैलो गर्न नपाउने कानूनको माग गरे । घरदैलो गर्न नपाउने र चुनावी सभा सम्मेलन मात्रै गर्नुपर्ने पद्धति ल्याउनुपर्ने उनले बताए । कांग्रेस सांसद अमरेशकुमार सिंहले उम्मेदवार र मतदातालाई भेट हुनै दिन नहुने बताए । भेट भयो भने त पैसा दिने र भोज खाने प्रवृत्ति हावी भएको कंडेलको भनाई छ ।

जनता समाजवादी पार्टीका सांसद राजेन्द्र श्रेष्ठले हालको मिश्रित निर्वाचन प्रणाली बदलेर खुला सूचीमा आधारित पूर्ण समानुपातिक निर्वाचन प्रणालीमा जान सकिने बताए । पूर्ण समानुपातिक प्रणालीमा जाँदा निर्वाचन अगावै उम्मेदवारको नाम तय हुने र निर्वाचनमा चलखेल गरेर चुनाव जित्नतिर लाग्ने वा शीर्ष नेताले आफ्नालाई टिकट दिने प्रवृत्ति रोकिएर योग्य र लोकप्रिय व्यक्तिले अवसर पाउने उनको भनाइ छ ।

नेकपाकी सांसद रेखा शर्माले सांसद श्रेष्ठले भने जस्तै खुला सूचीमा आधारित पूर्ण समानुपातिक निर्वाचन प्रणालीमा जान सकिने बताइन् । निष्ठाको राजनीति हराउँदै गएको र पैसा, नातेदार वा नेताका नजिक भएकै आधारमा राजनीतिक योगदानविनै सांसद बन्ने अवस्था आएको बताइन् ।