स्थायी कमिटी बैठक फेरि स्थगित

१३ साउन, काठमाडौं । सत्तारुढ नेकपाको स्थायी कमिटी बैठक फेरि स्थगित भएको छ । मंगलबार बिहान ११ बजेका लागि तय गरिएको स्थायी कमिटी बैठक अनिश्चितकालका लागि स्थगित गरिएको प्रधानमन्त्रीका प्रेस सल्लाहकार सुर्य थापाले जानकारी दिए ।

नेकपाका अध्यक्षद्धय प्रधानमन्त्री केपी शर्मा ओली र अर्का अध्यक्षबीचमा कुरा मिल्न बाँकी रहेकाले बैठक स्थगित गरिएको थापाले बताए । उनका अनुसार दुई अध्यक्षबीचमा छलफल तथा परामर्श गर्न बाँकी रहेकाले पनि बैठक स्थगित गर्नुपरेको थापाको भनाई छ ।

आजको बैठकमा प्रचण्ड–माधव नेपाल समूहले विशेष रणनीति बनाएको थियो । खासगरी स्थायी कमिटी बैठकबाट ओलीलाई कुनै एक पद छाड्ने बाध्य पार्ने निर्णय नै गर्ने योजना पनि प्रचण्डको थियो । यही सुचना पाएका ओलीले आजको बैठक स्थगित गरेको अनुमान छ ।

प्रचण्ड, माधव नेपाल, झलनाथ खनाल लगायतका नेताहरुले ओलीलाई प्रधानमन्त्री वा अध्यक्षमध्ये एक पद छाड्नुपर्ने बताउदै आएका छन् । तर ओलीले दुवै पद नछाड्ने बताएपछि नेकपाभित्रको आान्तरिक संकट गहिरिदै गएको छ ।