नेकपामा भीडन्तको तयारी : प्रचण्ड बालुवाटारमा, ओलीद्धारा बैठक स्थगित !

१३ साउन, काठमाडौं । प्रचण्ड, माधव नेपाल, नारायणकाजी श्रेष्ठ लगायतका नेताहरु बालुवाटार पुग्दा प्रधानमन्त्री केपी शर्मा ओलीले एकलौटी रुपमा नेकपाको स्थायी कमिटी बैठक स्थगित गरेको पाइएको छ । एकहप्तापछि आज मंगलबारका लागि तय गरिएको बैठकमा भाग लिन भन्दै प्रचण्ड लगायतका नेताहरु बालुवाटारमा पुगेका हुन् ।

तर बिहानै १० बजे प्रधानमन्त्रीका प्रेस सल्लाहकार सुर्य थापाले स्थायी कमिटी बैठक स्थगित भएको जानकारी फेसबुकमार्फत दिएका थिए । तर त्यो जानकारी ओलीको एकलौटी निर्णय भएको प्रचण्ड निकट नेताहरुको भनाई छ । नेकपाका प्रवक्ता नारायणकाजी श्रेष्ठले पनि स्थायी कमिटी बैठक स्थगितबारे आफूलाई जानकारी नभएको बताएका छन् ।

आफूहरु बैठकका लागि बालुवाटारको बैठकस्थलमा रहेको र बैठक सुचारु हुने विश्वास रहेको नारायणकाजीले बताएका छन् । तर ओली निकट नेताहरुले भने बिहान ९ बजे छलफलको तयारी भएपनि प्रचण्ड नआएका कारण बैठक स्थगित भएको बताएका छन् ।

यसअघि हिजो प्रचण्ड, माधव नेपाल लगायतका नेताहरुबीच आज पेलेर भएपनि बैठक गरेर बहुमतीय निर्णय गर्ने रणनीति बनेको थियो । प्रचण्डको त्यही रणनीतिबाट डराएका ओलीले आज एकलौटी रुपमा बैठक स्थगित गरेको आरोप छ । यसले नेकपामा अब भीडन्तको तयारी भएको भन्दै नेता कार्यकर्ता चिन्तित बनेका छन् ।