पद जोगाउन बामदेवसँग ओलीको सेटिङ, भैंसेपाटीमा सुटुक्क भेटवार्ता

१३ साउन, काठमाडौं । प्रचण्ड गुट छाडेर आफ्नो क्याम्पमा आएपछि प्रधानमन्त्री तथा नेकपाका अध्यक्ष केपी शर्मा ओलीले भैंसेपाटी पुगेर उपाध्यक्ष बामदेव गौतमसँग भेटवार्ता गरेका छन् । पछिल्लो समय बालुवाटार र शीतलनिवास नछाडेका ओली पहिलोपटक प्रधानमन्त्री र अध्यक्ष पद जोगाउन भैंसेपाटी पुगेका हुन् ।

खासगरी मंगलबारको बैठकमा ६ बुँदे प्रस्ताव पेश गरेर प्रधानमन्त्री ओलीको दुवै पद सुरक्षित राख्न लबिङ थालेपछि बामदेवको समीपमा ओली पुगेका हुन् । बामदेवको बोली फेर्ने शैली र लचकता अपनाउने कमजोरीलाई मध्यनजर गरेर अब ओलीले आफ्नो गुट शक्तिशाली बनाउने योजना बनाएका छन् ।

बामदेवको प्रवेशसँगै ओली अब सचिवालयमा पनि बहुमतमा पुगेका छन् । यससँगै मंगलबारको स्थायी कमिटी बैठकलाई पनि ओलीले चुनौति दिएका छन् । ओलीले एकलौटी स्थगित गरेको बैठक प्रचण्डले बहुमतका आधारमा सञ्चालन गरेका थिए । प्रचण्डको बैठकले ओलीले विधानविपरित बैठक स्थगित गरेको ठहर समेत गरेको थियो ।

जसलाई बामदेवले बचाउ गरेका थिए । उनले अब ओलीलाई दुुवै पदबाट हटाउनेभन्दा महाधिवेशनसम्म सहमति गरेर जानुपर्नेमा जोड दिएका थिए । बामदेव र ओलीको सहकार्यलाई अर्थपूर्ण ढंगले हेरिएको छ । यसले प्रचण्ड माधव नेपाल गुटलाई भने खुल्ला रुपमा चुनौति दिएको छ ।

यसअघि ओलीलाई प्रधानमन्त्री र अध्यक्ष पदबाट हटाउनुपर्ने पक्षमा उभिएका प्रचण्ड र माधव नेपाल अब आफ्नो अडानबाट पछाडी हट्नुपर्ने अवस्था आईलागेको छ । पछिल्लो समय पूर्व माओवादी र पुर्व एमाले नेताहरु पनि प्रचण्डभन्दा स्थिरताका लागि ओलीको पक्षमा उभिएका छन् ।