सत्याग्रहीको माग चाँडो पूरा गर्नुहोस् : नेता सिंह

१३ साउन, काठमाडौं ।  नेपाली कांग्रेसका नेता एवं पूर्वउपप्रधानमन्त्री प्रकाशमान सिंहले सत्याग्रहीले राखेको माग तत्काल पूरा गर्न सरकारलाई आग्रह गरेका । कोरोना भाइरसको सबल व्यवस्थापन र जीवन रक्षा गर्न माग गर्दै युवाले वसन्तपुरमा शुरु गरेको सत्याग्रहमा आज ऐक्यबद्धता जनाउँदै उनले कोरोना परीक्षणको दायरा बढाएर सत्याग्रहीले राखेको माग पूरा गर्न आग्रह गरे ।

इनफ इज इनफ समूहका युवाले गरेको सत्याग्रहमा उनले भने, “कोरोना सङ्क्रमित बढ्दा सरकार सचेत भएन सरकारले पिसिआर परीक्षणको दायरा बढाउनुपर्छ ।” कांग्रेसका पूर्वमहामन्त्री सिंहले भने, “एघार दिनदेखि कोरोना रोकथाम र नियन्त्रणका लागि सरकारले गरेका प्रयास राम्रो भएको छैन, युवाको माग सरकारले चाँडो पूरा गर्नपर्छ ।”

सत्याग्रहीका मागमा पूर्वमन्त्री एवं कांग्रेस नेता नविन्द्रराज जोशी, पूर्वराज्यमन्त्री उदयशम्शेर राणा, काठमाडौं महानगरपालिका उपप्रमुख हरिप्रभा खड्गी, काँग्रेस काठमाडौँका नेता राजुराज जोशीले ऐक्यबद्धता जनाएका छन।