सप्तरीमा एक प्रहरीसहित पाँच जनामा कोरोना, संक्रमितको संख्या ४७० पुग्यो

◊ धीरुभाइ

१६ साउन सप्तरी । कोरोना भाइरस संक्रमण एक प्रहरीसहित थप पाँच जनामा पुष्टि भएको छ । यससँगै जिल्लामा संक्रमितको संख्या ४७० पुगेको बताइएको छ ।

यता थप भएका प्रहरीसँगै जिल्लामा छ जना प्रहरी कोरोना भाइरसबाट संक्रमित भएको जिल्ला प्रहरी कार्यालय सप्तरीका प्रवक्ता प्रहरी नायब उपरीक्षक तिलक भारतीले बताए । संक्रमित प्रहरीमध्ये चार जना निको भएर डिस्चार्ज भइसकेका उनले एक जना आइसोलेसनमा उपचारत र नयाँ एक जनालाई आइसोलेसनमा ल्याउने तयारीमा रहेको बताए ।

हिजो राती थपिएका संक्रमितहरुमा राजविराज स्थित प्रहरी तालिम इकाइ केन्द्रका ३० वर्षीय प्रहरी हबल्दार, राजविराज नगरपालिका वार्ड नम्बर ६ का ४५ वर्षकी महिला, सोही वार्डका उमेर नखुलेका एक पुरुष, र वार्ड नम्बर नखुलेका २७ र २८ वर्षका पुरुषमा कोरोना संक्रमण भेटिएको स्वास्थ्य कार्यालय सप्तरीका शर्मिला चौधरीले बताइन ।

स्वास्थ्य कार्यालय सप्तरीका निमित प्रमुख दुनियालाल यादवका अनुसार गएराती अबेर ३८६ जनाको स्वाब परीक्षणको रिपोर्ट प्राप्त भएको छ । रिपोर्ट अनुसार थपिएका संक्रमितहरुमा एक प्रहरी, एक महिला, एक फलफूल व्यापारीसहित पाँच जना रहेको उनले बताए ।