सुनको भाउले रेकर्ड ब्रेक गर्ने क्रम जारी, तोलाको ९९ हजार !

१६ साउन, काठमाडौं । सुनको मूल्य शुक्रबार ९९ हजार ३०० रूपैयाँ प्रतितोला पुगेको छ। यो मूल्य बिहीबारका तुलनामा ३०० बढेको हो भने गत आइतबारका तुलनामा ३ हजार रूपैयाँले बढेको हो।

सुनको भाउले रेकर्ड ब्रेक गर्ने क्रम जारी छ । नेपाल सुन चाँदी व्यवसायी महासंघका अनुसार छापावाल सुनको भाउ तोलाको ९९ हजार ३ सय रुपैयाँ कायम भएको छ ।

यसैगरी, तेजावी सुनको भाउ तोलाको ९८ हजार ८६५ रुपैयाँ निर्धारण भएको छ । यो अहिलेसम्मकै सर्वाधिक बढी मूल्य हो । यता, चाँदी भाउ भने प्रतितोला २५ रुपैयाँले घटेर १२ सय रुपैयाँमा आएको छ ।

बिहीबार छापावाल सुनको भाउ तोलाको ९९ हजार रुपैयाँ रहेको थियो । यसैगरी, तेजावी सुनको भाउ तोलाको ९८ हजार ५६० रुपैयाँ निर्धारण भएको थियो । चाँदी भाउ प्रतितोला १२ सय २५ रुपैयाँ थियो ।

सुनको मूल्य तोलाको एक लाख नजिक पुग्दा किन्ने ग्राहक कम र बेच्ने ग्राहक बढ्न थालेका छन्। सुन चाँदीको मूल्य लगातार उकालो लागेपछि नयाँ खरिदकर्ता नहुँदा बजार सुनसान रहेको व्यवसायीले बताएका छन्।