आईपीएलले तोड्यो भिभो मोबाइलसँगको सम्झौता

२० साउन, एजेन्सी । सीमामा भारतीय सैनिक मारिएपछिको विरोधमा आईपीएलले चीनियाँ मोबाइल कम्पनी भिभोसँगको सम्झौता रद्द गरेको छ । भारतीय क्रिकेट बोर्ड बीसीसीआईले चिनियाँ मोबाइल कम्पनी भिभोसँगको मुख्य प्रायोजन सम्झौता रद्द गरेको हो ।

यस बर्षको आईपीएल यूएईमा हुदैछ । आउँदो १९ सेप्टेम्बरदेखि यूएईमा हुने आईपीएलले यस बर्ष भीभोसँग सम्झौता तोड्न बाध्य भएको भारतीय सञ्चारमाध्यमले जनाएका छन् । आईपीएलमा भिभो मोबाइलको मुख्य प्रायोजन हटाउन बीसीसीआईमाथि चर्को दबाब परेपछि उसले भिभोसँगको सम्झौता तोडेको हो ।

भिभोले पाँच वर्षसम्म मुख्य प्रायोजन गर्नको लागि सन् २०१८ मा आईपीएलसँग दुई हजार एक सय ९९ करोड भारुको सम्झौता गरेको थियो । सीमा क्षेत्रमा चिनियाँ सेनासँगको आक्रमणमा २० जना भारतीय सैनिकको ज्यान गएपछि दुई देशबीच तनाव बढिरहेको छ । भीभोसँगको सम्झौता तोडेपछि अब आईपीएलले कोसँग सम्झौता गर्छ ? भन्ने हेर्न बाँकी छ ।