सुनको भाउमा ऐतिहासिक रेकर्ड कायम

२२ साउन, काठमाडाैं ।  सुनको भाउले रेकर्ड ब्रेक गर्ने क्रम बिहीबार पनि जारी छ ।  सुनको भाउ बिहीबार प्रतितोला १ हजार १ सय रुपैयाँले बढेको छ ।

अघिल्लो दिनको तुलनामा प्रतितोला ११ सय रुपैयाँले बढेर सुनको भाउमा ऐतिहासिक रेकर्ड कायम भएको छ । नेपाल सुनचाँदी व्यवसायी महासंघका अनुसार छापावाल सुनको भाउ तोलाको १ लाख २ हजार ५ सय रुपैयाँ पुगेको छ ।

यसैगरी, तेजावी सुनको मूल्य तोलाको १ लाख २ हजार रुपैयाँ निर्धारण भएको छ । चाँदीको भाउ प्रतितोला १३ सय ४५ रुपैयाँ कायम भएको छ । बुधबार छापावाल सुनको भाउ तोलाको १ लाख १ हजार ४ सय रुपैयाँ रहेको थियो । यसैगरी, तेजावी सुनको मूल्य तोलाको १ लाख ९ सय रुपैयाँ थियो ।

एक तोला सुनको यो मूल्य हालसम्मकै उच्च हो । बढ्दो मूल्यका कारण सुनचाँदीको बिक्र अत्यन्तै न्यून रहेको महासंघले जनाएको छ ।

महासंघको तथ्यांकअनुसार केही महिनायता भाउमा लगातार नयाँ रेकर्ड बनाएको छ । भाउ दिनहुँ बढ्नुको एक कारण अमेरिका र चीनबीचको व्यापारिक युद्ध पनि हो । यीबाहेक अन्तर्राष्ट्रिय बजारमा बैंकहरूले ब्याजदर घटाएका छन् । जसले गर्दा लगानीकर्ताले सुनलाई नै प्राथमिकता दिएका छन् ।