प्रदेश सांसद कृष्णा केसीलाई कोरोना

२५ साउन, बुटवल । प्रदेश ५ की सांसद कृष्णा केसीलाई कोरोना भाइरस देखिएको छ । बाँकेको राप्ती सोनारी गाउँपालिका–९ की सांसद केसीले आफूलाई कोरोना भाइरसको संक्रमण भएको बताएकी हुन् ।

शनिबार राति सामाजिक सञ्जाल फेसबुकमा स्टाटस लेख्दै आफूलाई संक्रमित भएको र आफ्नो सम्पर्कमा आएकालाई पीसीआर परीक्षण गराउन पनि आग्रह गरेकी छिन् । भेरी अस्पताल नेपालगन्जमा गरिएको पीसीआर परीक्षणमा शनिबार बाँकेका ७ जना महिलासहित २० जना कोरोना संक्रमित थपिएका थिए ।

आफ्नो निर्वाचन क्षेत्र नरैनापुरमा यस महामारीका बेला विभिन्न कार्यक्रममा सहभागी हुँदा संक्रमण भएको पनि उनले बताएकी छिन् । पछिल्लो समय कोरोना संक्रमणको अवस्था बढेपछि नेपालगञ्ज सील गरिएको छ ।