शिक्षाशास्त्र हटाइएकोप्रति आपत्ति जनाउँदै विद्यार्थीहरुद्वारा विन्ध्यवासिनीलाई ज्ञापनपत्र

२५ साउन, कास्की । पोखरा महानगरपालिका वडा नम्बर १६ स्थित बाटुलेचौरमा रहेको विन्ध्यवासिनी माविमा शिक्षाशास्त्र विषय हटाइएकोप्रति आपत्ति जनाउँदै संयुक्त विद्यार्थी संगठन समूहले विद्यालयलाई ज्ञापनपत्र बुझाएका छन।

पटकपटक विद्यालयमा उपस्थित भएर मौखिक रुपमा असहमति जनाएपनि विज्ञान विषय सञ्चालनको नाममा शिक्षा विषय हटाइएपछि उक्त विवाद सिर्जना भएको विद्यार्थी सुदिक्षा बानियाँले जानकारी दिइन्।

विद्यालय व्यवस्थापन समितिका सदस्य यदुनाथ बन्जराको संयोजकत्वमा बनेको विषय छनौट समितिले प्रतिवेदन विद्यालय व्यवस्थापन समितिलाई बुझाइएपछि शिक्षा विषय हटाउने निर्णय गरिएको विद्यालयका प्रअ कृष्णप्रसाद आचार्यको भनाई छ।

विज्ञान विषय सञ्चालनमा पुर्ण साथ रहेपनि शिक्षाशास्त्र हटाउने निर्णयको विरुद्ध बारम्बार असहति प्रकट गरेपनि बेवास्ता गरेको हुदाँ बाध्य भएर ज्ञापनपत्र बुझाएको विद्यार्थी देव घर्ती मगरले बताए।

विद्यार्थीको मागप्रति अबपनि विद्यालय जिम्मेवार बनी निर्णय सच्चाउन तर्फ नलागे चरणबद्ध आन्दोलनमा जाने र विद्यार्थी आन्दोलनबाट सिर्जित सम्पुर्ण परिस्थितिको जिम्मेवारी विद्यालय प्रशासनले व्यहोर्नुपर्ने चेतावनी विद्यार्थी विराज मानन्धरले दिएका छन्।