राप्रपालाई कांग्रेस र कम्यूनिस्टको दाँजोको अग्रणी शक्ति बनाईने : अध्यक्ष थापा

२६ साउन, काठमाडौं । प्रवासी नेपाली एकता समाज अष्ट्रेलियाको प्रथम वार्षिकोत्सव कार्यक्रम सम्पन्न भएको छ । वार्षिकोत्सव कार्यक्रममा बोल्दै राप्रपा अध्यक्ष कमल थापाले विधिवत रूपमा राप्रपा एक भई सकेको र आगामि दिनमा राप्रपालाई कांग्रेस र कम्यूनिस्टको दाँजोको अग्रणी शक्ति बनाईने बताएका छन।

स्वदेश तथा प्रवासमा रहने नेपालीको चाहाना पार्टी एकता र मुलुकमा बलियो राष्ट्रवादी शक्ति निर्माण रहेको बताउँदै उनले कोरोना प्रकोपको कारण पार्टीलाई एकताको स्प्रिट अनुसार अगाडि वढाउन नसकिएको स्वीकार गरे । तर आगामि दिनमा सशक्त भएर अगाडि बढने उनले बताए ।

विभिन्न जिल्लाहरूमा राप्रपामा प्रवेश गर्नेहरूको उत्साह बढेको बताउँदै अब पार्टीको कसैले चिन्ता लिन जरुरी नभएको उनले उल्लेख गरे । जीवन्त पार्टीमा छलफल, बहस स्वभाविक भएको उनले बताए । हिन्दुराष्ट्रको एजेन्डा बोकेको पार्टीको चुनाव चिन्ह स्वभाविक रूपले गाई हुँदा राम्रो हुने बताउदै चिन्हको विषय सहमति र समझदारीको आधारमा टुङ्याईने उनको स्पष्ठउक्ति थियो ।

जनताले विकल्प खोजी रहेको अवस्थामा कांग्रेस कम्यूनिस्टको विकल्प राप्रपा मात्र हुनसक्ने बताउँदै ०६२/०६३ को मार्गचित्रको असफलता पछि एकमात्र वैचारिक प्रतिपक्ष राप्रपा भएको बताए । राप्रपालाई आउदो चुनावसम्म ठुलो सफलता दिलाउन प्रवासमा रहेका सबै साथिहरूको महत्त्वपूर्ण भुमिका रहने उनले बताए ।

शुभकामना दिँदै अर्का अध्यक्ष पशुपतिशमशेर राणाले नेपालको चिनारी धर्म, परम्पराले गर्दै आएकोमा धर्म निरपेक्षताले मुलुकको पहिचान गुमेर ठुलो धोका भएको बताए । ठुला दलले न्युनतम ईमानदारी र दक्षता प्रदर्शन गर्न नसकेको बताउँदै राप्रपा मात्र मुलुकको वैकल्पिक शक्ति रहेको उनले बताए । प्रवासमा रहेको नेपालीहरूको लागि राप्रपा हर प्रकारको सहयोग गर्न तैयार रहेको बताउँदै राणाले अब मुलुकले प्रवासी नेपालीको सहयोग खोजेको बताए ।

अर्का अध्यक्ष डा.प्रकाशचन्द्र लोहनीले टेलिफोन मार्फत प्रवासी नेपाली एकता समाज अष्ट्रेलियाको प्रथम वार्षिकोत्सवको उपलक्ष्यमा शुभकामना व्यक्त गरेका थिए । सो कार्यक्रममा बोल्दै राप्रपा केन्द्रीय सदस्य विजय खडकाले विश्वको २६ देशमा राप्रपा समर्थित प्रवासी नेपाली एकता समाजको सशक्त संगठन रहेको बताए । राजसंस्था, हिन्दुत्व र समृद्ध नेपालको लागि प्रवासमा ठुलो आकर्षण रहेको उनले वताए ।

सो अवसरमा राप्रपा युरोपको अध्यक्ष सुरेन्द्रमान अमात्य, युएईका सल्लाहकार विश्वदेव शाह, कतारका अध्यक्ष गौतम रिजाल, वरिष्ठ सल्लाहकार डा.रामकृष्ण निरौला, समाजसेवी दिनेश पोखरेल लगायतले शुभकामना व्यक्त गरेका थिए । कार्यक्रम प्रवासी नेपाली एकता समाज अष्ट्रेलियाका अध्यक्ष अजय राजवंशीले संचालन गरेका थिए ।