जसपाले प्रयोग गरेको भाषा अशिष्ट र पूर्वाग्रही भएको प्रधानमन्त्री सचिवालयकाे टिप्पणी

२७ साउन, काठमाडौं । जनता समाजवादी पार्टीले प्रधानमन्त्री केपी शर्मा ओलीबारे अशिष्ट र पूर्वाग्रही टिप्पणी गरेको भन्दै प्रधानमन्त्रीको सचिवालयले खेद प्रकट गरेको छ । प्रधानमन्त्रीको सचिवालयले त्यसलाई कुण्ठाग्रस्त गालीगलोज र दिवालियापन भन्दै निन्दा गरेको छ ।

प्रधानमन्त्रीका प्रेस सल्लाहकार सूर्य थापाले मंगलबार एक प्रेस नोट जारी गर्दै जसपाले प्रयोग गरेको भाषा शैलीलाई कुण्ठाग्रस्त गालीगलोज र दिवालियापनको संज्ञा दिएका छन् ।

जनता समाजवादी पार्टीको केन्द्रीय कार्यकारिणी समितिको बैठकपछि यही साउन २५ गते जारी विज्ञप्तिमा ‘प्रधानमन्त्री ओली शारीरिक र मानसिक दृष्टिले अत्यन्तै कमजोर रहेको’ र ‘देशभित्र विभाजनको बीउ रोप्ने कार्य’ गरेको उल्लेख छ ।त्यसको दुई दिनपछि मंगलबार बिहान प्रधानमन्त्रीका प्रेस सल्लाहकार थापाले प्रेस नोट जारी गर्दै जनता समाजवादी पार्टीको विज्ञप्तिमा प्रधानमन्त्रीप्रति प्रयोग गरिएको भाषा निन्दनीय भएको उल्लेख गरेका छन् ।

पटक–पटक राज्यका जिम्मेवार तहमा रहिसकेका र प्रधानमन्त्रीको समेत जिम्मेवारी सम्हालेका व्यक्तिहरु कुण्ठाग्रस्त गालीगलौचमा उत्रिएको पनि प्रेस सल्लाहकारले आरोप लगाएका छन् । राजनीतिमा विवाद, मतभेद र असहमतिलाई स्वाभाविक मान्न सकिने उल्लेख गर्दै प्रेस सल्लाहकार थापाले जसपाले ‘अपसंस्कार’ देखाएको टिप्पणी गरेका छन् ।

राजनीतिमा दलहरुले आफ्ना धारणा र विमति प्रस्ट्याउने गरी सरकारको आलोचना र विरोध गर्न सक्ने उल्लेख गर्दै प्रेस सल्लाहकार थापाले भनेका छन्, ‘राष्ट्रपति, प्रधानमन्त्री र जिम्मेवार पदाधिकारीविरुद्ध प्रयोग गरिने अपमानजनक तथ्यहीन, भ्रामक र गैरजिम्मेवार भाषप्रति गम्भीर आपत्ति प्रकट गर्नैपर्छ । जो सभ्य समाजको मूल्य र मानकविपरीत रहेका छन् । तसर्थ: जसपाको औपचारिक विज्ञप्तिमा प्रयोग गरिएको भाषा निन्दनीय रहेकोतर्फ सम्बन्धित सबैलाई स्पष्ट गर्दछु ।’