औषतभन्दा खराब अवस्थामा रहेको लिवर्टी इनर्जीको आईपीओ आउँदै

२७ साउन, काठमाडौं । लिवर्टी ईनर्जी कम्पनी लिमिटेडले सर्वसाधारणका लागि साधारण शेयर निष्काशन गर्ने भएको छ । कम्पनीले आयोजना प्रभावित स्थानियको लागि साउन २१ गतेसम्म शेयर निष्काशन गरेर गत साउन २४ गते नै बाँडफाँड गरिसकेको छ ।

कम्पनीले ३५ लाख ६४ हजार ९३० कित्ता साधारण शेयर निष्कासन गर्ने तयारी गरेको छ । कम्पनीले भदौ ३ गतेदेखि सो शेयर निष्काशन गर्ने जनाएको छ । कम्पनीले जारी पुँजीको २५ प्रतिशतको ३७ लाख ५० हजार कित्तामध्ये स्थानीय बासिन्दाका लागि निष्कासन गरी बाँडफाँट नभएको १३ लाख १५ हजार ९३० कित्तासमेत जोडेर सर्वसाधारणलाई आईपीओ निष्कासन गर्ने तयारी गरेको हो । कम्पनीको धितोपत्र निष्कासन तथा बिक्री प्रबन्धक एनआइबिएल एस क्यापिटल लिमिटेड रहेको छ ।

प्रतिकित्ता १०० अंकित दरका सो सेयरमा न्यूनतम १० कित्ताका लागि आवेदन दिन सक्नेछन् भने अधिकतम १० हजार कित्ताका लागि आवेदन दिन सक्नेछन् । निष्कासन बन्द छिटोमा भदौ ७ गते हुनेछ भने ढिलोमा भदौ १७ गते हुनेछ । कम्पनीले निष्कासन गर्न लागेको आईपिओलाई रेटिङ एजेन्सी इक्रा नेपालले ‘इक्रा एनपी आईपीओ ग्रेड ४’ रेटिङ दिएको छ। यसले कम्पनीको आधारभूत अवस्था औसतभन्दा कमजोर रहेको संकेत गर्दछ । कम्पनीको लगानी फिर्ता हुने अवधि ८.२० वर्ष र डिस्काउन्ट लगानी फिर्ता रहने अवधि १६.६६ वर्षको छ । कम्पनीको (साधारण शेयर)आईपीओमा सि–आस्वा सदस्य भएका बैंक तथा वित्तीय संस्थाबाट आवेदन दिन सकिनेछ ।

कम्पनीको निर्माण अवधिको ब्याजसहित प्रति मेगावाट लागत १८ करोड ५४ लाख ४३ हजार ८३७ रुपैयाँ लाग्ने देखिएको छ । त्यसैगरी, कम्पनीको कुल अनुमानित लागत ४ अर्ब ६३ करोड ६० लाख ९५ हजार ९२१ रुपैयाँ ७२ पैसा रहेको छ। कम्पनीको विद्युत उत्पादन अनुमतिपत्र सम्झौता ३० वर्षको रहेको छ ।