पहिलो पटक सुनको भाउ भारी मूल्यले घट्याे

२८ साउन, काठमाडाैं । बुधबार सुनको भाउ ह्वातै घटेको छ । यसदिन सुनको भाउप्रति तोला ६ हजार २ सय रुपैयाँले घटेको हो । विगतमा बेस्सरी चुलिएको सुन अब घट्ने क्रममा लागेको छ ।

नेपाल सुनचाँदी व्यवसायी महासंघका अनुसार छापावाल सुनको भाउ तोलाको ९५ हजार ४ सय रुपैयाँमा आएको छ । यसैगरी, तेजावी सुनको मूल्य तोलाको ९४ हजार ९ सय रुपैयाँ निर्धारण भएको छ । चाँदीको भाउ पनि प्रतितोला २२५ रुपैयाँले घटेर १२ सय १० रुपैयाँ कायम भएको छ ।

मंगलबार छापावाल सुनको भाउ तोलाको १ लाख १ हजार ६ सय रुपैयाँ थियो । यसैगरी, तेजावी सुनको मूल्य तोलाको १ लाख १ हजार १ सय रुपैयाँ निर्धारण भएको थियो ।  चाँदीको भाउ प्रतितोला १४ सय ३५ रुपैयाँ रहेको थियो ।

अन्तर्राष्ट्रिय बजारमा सुनचाँदीको मूल्य घटेसँगै नेपाली बजारमा पनि भारी गिरावट आएको हो । भाउ अझै तल झर्न व्यवसायीहरुले अनुमान लगाउन थालेका छन् ।

कोभिड १९ विरुद्धको खोप रसियाले तयार पारेको खबरले अन्तर्राष्ट्रिय बजारमा लगानीकर्ताको मनोबल उच्च भएका कारण सुनको मूल्य ओरालो लागेको तथा डलर मजबुत हुन थालेका कारण सुनका लगानीकर्ता नाफा सुरक्षित गर्न लागेको व्यवसायीहरुको दाबी छ ।