प्रचण्डलाई फकाउँदै ओली

२९ साउन, काठमाडौं । नेकपाभित्रको चर्कंदो सत्तासंघर्ष उत्कर्षतर्फ उन्मुख भएकै बेला आज दुई अध्यक्षबीच संवादको श्रृँखला जोडिएको छ । आठ दिनयता ठप्प रहेको दुई अध्यक्षबीचको संवाद आज बिहान प्रधानमन्त्री निवास बालुवाटारमा शुरु भएको छ ।

हिजो साँझ एउटा टेलिभिजन अन्तर्वार्तामा प्रधानमन्त्रीसमेत रहेका पार्टी अध्यक्ष केपी ओलीले भदौ १ गते भित्र पार्टी एकता कायम हुने ठोकुवा गरको भोलिपल्टै दुवै अध्यक्ष छलफलमा जुटेका हुन् । तर कुन बुँदामा कसरी सहमति जुट्छ भनेर चाहिं प्रधानमन्त्रीले खुलाएका छैनन् । बालुवाटार निकट स्रोत भन्छ– प्रचण्डको महत्वाकांक्षालाई थोरै मात्र समाउन सक्दा समस्याको हल निस्कन सक्छ ।

यसका लागि ओलीले प्रचण्डसँगको संवादको श्रृँखला जोड्नै पर्ने बाध्यता थियो । त्यसैले आज बिहान ओलीले नै फोन गरेर प्रचण्डलाई वार्ता गर्न बालुवाटार डाकेका थिए । ओली चाहन्छन्– प्रचण्डलाई इन्गेजमा राखेर पार्टी र सरकारमा हालीमुहाली गरौंं । प्रकारान्तरले ओलीकै लाइनमा घटनाक्रम अगाडि बढिरहेको छ । पुुष्पकमल दाहाल प्रचण्डकै निकट साथीहरु अहिले माधव नेपालसँग हिमचिम बढाउने भन्दा ओलीसँगकै सहकार्यलाई बलियो बनाउँदा फाइदा हुने ठम्याईमा छन् ।

पूर्व माओवादी पक्षका प्रभावशाली नेताहरुको यस्तै भावना र सोचले ओलीसँग मिल्न प्रचण्डमाथि चर्काे दवाव परेको छ । त्यसैले पनि अहिले दुवै अध्यक्ष मिलेर जानुपर्ने बाध्यता रहेको छ । ओलीले पाँच दिन भित्रै पार्टी भित्रको विवाद मिल्ने दावी गरेका थिए । ओलीलाई प्रचण्डसँग मिलेरै अगाडि बढ्न उनी पक्षकै कतिपय नेताहरुले जोडबल गरेका छन् । गएको एक हप्तामा दुवै अध्यक्षबीच संवाद टुटेका बेला ओली निकट नेताहरु शंकर पोखरेल, सुभाषचन्द्र नेम्बाङ, विष्णु पौडेललगायतका नेता संवाद जोड्न सक्रिय रहे ।

उनीहरुकै पहलमा ओलीले आज बिहान प्रचण्डलाई छलफल गर्न बोलाएका हुन् । आजको छलफलमा ओलीले प्रचण्डलाई इन्गेज गराउने प्रस्ताव पेश गर्ने स्रोतको दावी छ । स्रोत भन्छ– अर्ली महाधिवेशनमा माधव समूहले रुची नदेखाएकाले निर्धारित तालिका अनुसार चैतमै गर्ने गरी छलफल केन्द्रित हुनेछ । साथै, चैत २५–३० गतेसम्म गर्ने भनिएको एकता महाधिवेशन आयोजक कमिटी तत्कालै गठन गरिने छ ।

उक्त आयोजक कमिटीको संयोजकमा प्रचण्ड रहने गरी ओलीले प्रस्ताव गरेको स्रोतको दावी छ । तर प्रचण्डले यो प्रस्तावबारे अन्य नेताहरुसँग पनि छलफल गर्नुपर्ने बताएका थिए । यसका लागि स्थायी कमिटी बैठकले नै निर्णय गरोस् भनी प्रचण्डले प्रस्ताव गरेको स्रोतको भनाई छ । तर ओली भने अब गर्ने निर्णय सचिवालय बैठकमा मात्रै हुनुपर्ने शर्त राखेको पनि स्रोतले बताएको छ ।