ओली–प्रचण्डको चार घण्टा वार्ता : सकारात्मक तर निष्कर्षविहिन !

२९ साउन, काठमाडौं । झण्डै पाँच महिनादेखि चर्किएको सत्तारुढ नेकपाभित्रको आन्तरिक विवाद समाधान उन्मुख भएको दाबी गरिएको छ । प्रधानमन्त्री तथा अध्यक्ष केपी शर्मा ओली र अर्का अध्यक्ष पुष्पकमल दाहाल प्रचण्डबीचको बिहीबारको वार्ता सकारात्मक भएको दाबी गरिएको छ । तर ठोस सहमति भने भइसकेको छैन् ।

बैठक निष्कर्षविहिन भएपनि सकारात्मक भएको नेताहरुले बताएका छन् । झण्डै एक हप्तापछि दुई अध्यक्षबीचको वार्ता समाधानमुखी रहेको दाबी छ । यसअघि एक टेलिभिजन कार्यक्रममा बोल्दै प्रधानमन्त्री ओलीले नेकपाभित्रको आन्तरिक विवाद पाँच दिनमै टुंगिने बताएका थिए ।

सोही अनुसार आज दुई अध्यक्षबीच वार्ता भएको हो । बिहान ११ बजेदेखि दिउँसो ३ बजेसम्मको वार्ता सकारात्मक भएको प्रधानमन्त्री ओली निकट स्रोतले दाबी गरेको छ । बालुवाटार जानुअघि प्रचण्डले खुमलटारमा वरिष्ठ नेता माधव कुमार नेपालसँग छलफल गरेका थिए ।