अब्बल बैंकर रत्नराज बज्राचार्य ग्लोबल आईएमई बैंकको सीईओमा नियुक्त

३० साउन, काठमाडौं । अब्बल बैंकर परशुराम कुँवर क्षेत्रीले कार्यकाल बाँकी छँदै राजीनामा दिएपछि रिक्त रहेको ग्लोबल आईएमई बैंकको प्रमुख कार्यकारी अधिकृत (सीईओ) मा रत्नराज बज्राचार्य नियुक्त भएका छन् ।

आज शुक्रबार बसेको बैंक सञ्चालक समितिको बैठकले चार्टर्ड एकाउण्टेन्ट समेत रहेका बज्राचार्यलाई आगामी चार वर्षे कार्यकालका लागि सीईओमा नियुक्त गर्ने निर्णय गरेको हो ।

उनले आगामी भदौ १ गतेदेखि कार्यभार सम्हाल्ने छन् । बज्राचार्य यसअघि पनि ग्लोबल आईएमई बैंकको प्रमुख कार्यकारी अधिकृत थिए । सो बैंकमा एक कार्यकाल पूरा गरेपछि उनी सनराइज बैंकको प्रमुख कार्यकारी अधिकृत बनेका थिए ।

सनराइज बैंकपछि फेरि बैंकिङ क्षेत्रमा नर्फकने बताएका उनी ग्लोबल आईएमईमा दोस्रो कार्यकालका लागि फर्केका छन् ।
दुई ठूला बैंकहरु ग्लोबल आईएमई र जनता बैंक नेपालको बिगमर्ज भएर बनेको यस बैंकको कार्यकारी नेतृत्व पर्शुराम कुँवरले गरेका थिए । बज्रचार्य लामो अनुभव भएका अब्बल बैंकर हुन् ।

बज्राचार्यसँग बैंक तथा वित्तीय क्षेत्रमा करिब ४० वर्षको अनुभव छ । कडा मिजासका बैंकरका रुपमा चिनिने बज्राचार्य एनसीसी बैंकमा पनि सीईओ भइसकेका छन्। नेपाल राष्ट्र बैंकका पूर्व कार्यकारी निर्देशक बज्राचार्यले त्यहाँ २० बर्ष काम गरेका थिए ।