पक्राउ परेका विद्यार्थी नेताहरूलाई तत्काल रिहा गर्न नेविसंघको माग

३० साउन, काठमाडौं । नेपाल विद्यार्थी संघले पक्राउ परेका विद्यार्थीलाई तत्काल रिहाई गर्न माग गरेको छ । त्रिभुवन विश्वविद्यालयमा तोडफोड गरेकाे आरोपमा पक्राउ परेका आफ्ना विद्यार्थी निर्दोष रहेको भन्दै नेविसंघले तत्काल छाड्न माग गरेको हो ।

नेविसंघका अध्यक्ष राजीव ढुंगानाले एक विज्ञप्ती जारी गर्दै विद्यार्थीलाई तत्कालै छाडेर उनीहरुमाथि लगाइएको मुद्दा फिर्ता लिन माग गरेका छन् । ‘गत साउन २७ गते त्रिभुवन विश्वविद्यालयका उपकुलपतिको निर्देशनमा सुनियोजित ढंगले तोडफोड गराई उक्त घटना नेविसंघले गराएको भनि दुष्प्रचार गरी विद्यार्थी नेताहरु सम्झना खत्री, श्याम राज ओझा, हरि जोशी, विष्णु पौडेल, गणेश थानी, रमेश कुँवरलगायत ८ जनालाई गिरफ्तार गरिएकोमा उहाँहरुलाई रिहा गर्नुको सट्टा सत्ताको आडमा झुठा मुद्दा लगाई फसाउन गरिएको षडयन्त्रको हामी घोर भत्र्सना गर्दछौँ’ विज्ञप्तीमा भनिएको छ।

नेविसंघले अहिलेका उपकुलपति आएपछि त्रिभुवन विश्वविद्यालय प्राज्ञिक थलो नभई नेकपाको भर्ती केन्द्र भएको आरोप पनि लगाएको छ। नेविसंघले उपकुलपतिले विश्वविद्यालयलाई भर्ती केन्द्र बनाउन नछाडे इँटाको जवाफ पत्थरले दिने चेतावनी समेत दिएको छ । यस्तै नेविसंघले साउन २६ गते पर्साको वीरगन्जमा गिरफ्तारीमा परेको विद्यार्थी नेतालाई सोही दिन राती छोडेको र २८ गते पुन मुद्दा लगाएर फसाउन खोजेको भन्दै विरोध जनाएको छ ।

गत श्रावण २६ गते पर्सा जिल्लाको वीरगन्जमा सबै स्वास्थ्य संस्थाहरुमा नियमित स्वास्थ्य सेवा प्रदान गरियोस, कोरोना संक्रमितको उपचारमा लापरबाही नगरियोस् र कोरोनाका कारण मृत्यु भएकाहरुलाई उचित क्षतिपूर्ति दिइयोस् भनी शान्तिपूर्ण प्रदर्शन गर्दा गिरफ्तार गरी सोही दिन राती साँढे ११ बजे मात्र रिहा गरिएका विद्यार्थी नेता विकास तिवारीलाई पुन अस्ति २८ गते पक्राउ गरी झुठा मुद्दा लगाई फसाउन खोजिएको घटनाको घोर भत्र्सना गर्दछौँ’ नेविसंघले विज्ञप्तीमा भनेको छ। नेविसंघले दुवै ठाउँमा पक्राउ परेका विद्यार्थीहरुलाई तुरुन्तै रिहा गर्न सरकारसँग माग गरेको छ।