प्रभु बैंकको ऋणपत्र माग गरेबामोजिम सबैले पाए, केही आवेदन भने रद्द

३२ साउन, काठमाडौं । प्रभु बैंक लिमिटेडले बिक्रीका लागि राखेको २ अर्ब रुपैयाँ बराबरको ऋणपत्र बाँडफाँड भएको छ । ऋणपत्र नबिल इन्भेष्टमेन्ट बैंकिंङ्ग लिमिटेडको कार्यलयमा गत शुक्रबार बाँडफाँड गरिएको थियो । बैंकको ऋणपत्रमा सर्वसाधारण समूहलाई सात लाख ६० हजार कित्ता ऋणपत्र खरीद आह्वान गरिएकोमा २ हजार ३०८ जना आवेदकहरुबाट कूल सात लाख ३० हजार ३६५ कित्ता ऋणपत्रको लागि आवेदन परेको थियो। बैंकको ऋणपत्रमा माग गरिएको भन्दा ३.०७ गुण बढीले आवेदन परेको नबिल क्यापिटलले जानकारी दिएको छ ।

नबिल क्यापिटलका अनुसार ४१७ जना आवेदकहरुबाट आवेदन पर्न आएको जम्मा तीन लाख ५१ हजार २३१ कित्ता ऋणपत्र विभिन्न कारणवश रद्द भएको हुँदा रितपूर्वक १ हजार ८९१ जना योग्य आवेदकहरुलाई मात्र माग गरे बमोजिम नै बाँडफाँड गरिएको क्यापिटलले जनाएको छ। रितपूर्वक १ हजार ८९१ जना योग्य आवेदकहरुलाई कूल ३ लाख ७९ हजार १३४ कित्ता ऋणपत्र बाँडफाँड गरिएको हो ।

त्यसैगरी व्यक्तिगत तवरबाट १२ लाख कित्ता ऋणपत्र खरिद आह्वान गरिएकोमा ४५ जना योग्य आवेदकहरुलाई सर्वसाधारण समूहबाट बाँकी रहेको ३ लाख ८० हजार ८६६ कित्ता समेत गरी कूल १५ लाख ८० हजार ८६६ कित्ता ऋणपत्र बाँडफाँड गरिएको छ।

बैंकले गत श्रावण १९ गतेदेखि श्रावण २३ गतेसम्म एक हजार रुपैयाँ अंकित दरमा “१० प्रतिशत प्रभु बैंक डिबेन्चर २०८४” निष्काशन गरेको थियो। जसमा १२ लाख कित्ता डिबेन्चरले हुन आउने कूल१ अर्ब २० करोड ऋणपूँजी रकम बरावरको विभिन्न व्यक्ति वा संघ संस्थाहरुलाई व्यक्तिगत तवरबाट र ८ लाख कित्ता डिबेन्चरले हुन आउने कूल ८० करोड ऋण पूँजी रकमको ५ प्रतिशत अर्थात ४०,००० युनिट सामुहिक लगानी कोषका लागि बाडँफाँट गरी गरिएको थियो । बाँकी रहेको ७,६०,००० कित्ता डिबेन्चर सर्वसाधारण नेपालीहरुको लागि निष्काशन खुल्ला गरिएको थियो ।