काउन्सिलमा अध्यक्ष श्रेष्ठलाई काम गर्न दिन सर्वोच्चको आदेश

३ भदौ, काठमाडौं । सर्वोच्च अदालतले प्रेस काउन्सिलका कार्यवाहक अध्यक्ष किशोर श्रेष्ठलाई हटाउने मन्त्रिपरिषदको निर्णय कार्यान्वयन नगर्न अन्तरिम आदेश जारी गरेको छ । बुधबार सर्वोच्चले जारी गरेको आदेशमा प्रेस काउन्सिल ऐन विपरित मन्त्रिपरिषदबाट पारित भएको नियमावली कार्यान्वन नगर्न नगराउन उल्लेख छ ।

यससँगै नियमावलीबाट कार्यवाहक अध्यक्षमा नियुक्त दुर्गा भण्डारीले काम गर्न नपाउने भएकी छन् । सर्वोच्चको आदेशले हालका कार्यवाहक अध्यक्ष श्रेष्ठलाई काम गर्ने बाटो खुला गरेको छ । सर्वोच्चबाट अन्तरिम आदेश पाएपछि अध्यक्ष श्रेष्ठले प्रेस काउन्सिलको स्वायत्तता जोगिएको प्रतिक्रिया दिएका छन् ।

‘प्रेस काउन्सिलको स्वायत्तता जोगियो । सरकारद्वारा जारी पूर्वाग्रहपूर्ण र ऐन विरोधी नियमावली सर्वोच्चबाट रोक’ श्रेष्ठले फेसबुकमा लेखेका छन, ‘हाल कार्यरत कार्यवाहक अध्यक्षलाई काम गर्न रोक नलगाउने आदेश ।’

सरकारले गएको सोमबार ऐनविपरित मन्त्रिपरिषद बैठकबाट नियमावली संशोधन गरेर हालै सदस्यमा नियुक्त गरिएकी दुर्गा भण्डारीलाई कार्यवाहक अध्यक्ष तोकेर श्रेष्ठलाई हटाएको थियो ।