सरकारको अकर्मण्यताका बीच कांग्रेस महाधिवेशन

♦ गुरुप्रसाद भट्टराई

पुरै दुनियाँ झैं नेपाल पनि कोराेना महामारीबाट गुज्रिरहेको छ । तयारीको लागि पाएको प्रशस्त समय सरकारको संवेदनहिनताले खेर गएपछि देश संकटउन्मुख हुँदै गैरहेको छ । सारा देश एकिकृत भै कोरोना विरुद्ध लड्नु पर्नेमा सत्तासिनहरु नै एकआपसमा बाझाँबाझ गरेर रमिता देखाए । उनीहरुको ‘लेनदेन’ त मिल्यो होला । बाडिचुडी खादाँ कसले के पाउने, कति पाउने भन्ने हिसाब पनि मिल्यो होला । तर, देशले यस्तो संवेदनशिल समय व्यर्थमा गुजार्यो ।

कांग्रेसका युवा नेता गगन थापाले फाल्गुनको पहिलो हप्ता संसदमा जरुरी सार्वजनिक महत्वको प्रस्ताव टेवल गर्दा कोरोना विरुद्ध सँगै लडौं भनि देखाएको अठोटलाई सरकारले वास्ता गरेन । माननीय थापाले कोरोना विरुद्धको लडाइको लागि स्पष्ट मार्गचित्र संसदमा प्रस्तुत गरेको भिडियो अझै पनि भेटिन्छ, सारा जनताले अझै हेरिरहेकै छन् । तर, सरकारले देखेन ।हुनत, कोरोनालाई भयावह बनाएर संकटकालिन खरिद भन्दै ‘थैली भित्र्याउने’ सरकारी योजनामा गगन थापाको प्रस्ताव बाधक थियो होला । तर, जनता जोगाउने त्यो प्रष्ट योजना लागु भएको भए अहिले हामी ‘इटली’ बन्ने यात्रामा भने हुने थिएनौं ।

कोरोनाकै बीच अहिले देशकै पुरानो लोकतान्त्रिक पार्टी नेपाली कांग्रेस आफ्नो चौधौं महाधिवेशनको सन्नीकट छ । आउँदो फाल्गुनमा देशभरिका कांग्रेसजन नेपाली कांग्रेसलाई फेरि चुस्तदुरुस्त बनाउने बहस र योजना निर्माणमा लाग्ने छन् । पार्टीले नयाँ नेतृत्व पाउने छ । नेकपा सरकार यति अलोकप्रिय र असफल हुदाँ पनि हामीले जनतालाई भन्न र बुझाउन सकेका छैनौं । सकेनौं भन्दा पनि बुझाउनै खोजेनौं । किन खोजेनौं ? जवाफ महाधिवेशनको हल मै मागौंला । त्यही बहस गरौंला ।

तर, पार्टी नेतृत्व यदाकदा आफ्नै कमजोरीका कारण जनमानसमा प्रतिपक्ष हो कि कम्युनिष्ट प्रधानमन्त्री केपी ओलीको सहयोगी हो भन्ने प्रष्ट नदेखिनु चाँही रहस्यमय पक्कै छ । हो, कोरोनाका विरुद्ध नेपाली कांग्रेस सरकारको सहयोगीको रुपमा रहने हाम्रो घोषित नीति नै हो । यो आजको आवश्यकता पनि हो ।

तर, यसको अर्थ भ्रष्टाचारमा इतिहास कायम गरेको सरकारका अनियमितताको पनि हामीले विरोध गर्न सकेनौं । केही युवा नेताहरुले कडा शब्दमा आवाज निकालेपनि मुलनेतृत्वले त्यस्को जिम्मेवारी बहन गरेको देखिएन । सरकार सञ्चालनमा नेकपा र केपी ओली पूर्ण असफल त भए नै, प्रतिपक्षका रुपमा हाम्रो भुमिका पनि खासै सफल भएन ।

अबको महाधिवेशनमा कांग्रेसले चयन गर्ने नेतृत्वले एउटा पार्टीको भविष्यमात्र निर्धारण गर्दैन, समग्र देशकै विकास र सम्वृद्धिमा प्रभाव पार्ने छ । आफ्ना भ्रष्ट गतिविधि कायम राख्न केपी ओलीलाई कांग्रेसमा फेरी पनि कमजोर नेतृत्व नै चाहिएको छ । त्यसैले कांग्रेसलाई अलोकप्रिय र विभाजित राखिरहन सहज हुने गरि ओलीले साथ दिईरहेका छन् । यसको लागि उनले विभिन्न नियुक्ती र सरकारको दुरुपयोग गर्ने पनि उक्तिकै सम्भावना छ ।

तर, यी कुनै पनि जालझेलले अब कांग्रेसको यात्रामा असर गर्ने छैन, गर्नु हुँदैन । कांग्रेसजनले आउँदो महाधिवेशनबाट बितेको पाच वर्षको क्षतिपुर्ति पनि भराउने गरि नयाँ नेतृत्व चयन गर्ने छन्, गर्नैपर्ने छ । युवा नेताको सोचविचारी जोश र आकर्षणले कांग्रेसलाई देशको नेतृत्व गर्ने ठाउँमा पु¥याउने छ ।

गुमेको पार्टी र देशको साख हामीले फेरी फिर्ता ल्याउन सक्ने गरि युवा नेतालाई पार्टीको बागडोर जिम्मा लगाउदै छौं । अनि महाधिवेशन पछि सरकारका सबै कर्तुत जनता समक्ष छर्लड्ग पारेर ओली राजका लुट समाप्त गर्ने छौं ।

(लेखक भट्टराई नेपाली कांग्रेसका युवा नेता हुन् ।)