कोरोनापछि उडानका लागि ८ देशमाथिको प्रतिबन्ध फुकुवा

१० भदौ, काठमाडौं । अन्तराष्ट्रिय उडान खोल्ने निर्णयसँगै सरकारले विभिन्न ८ वटा देशमा उडान फुकुवा गरेको छ । गत चैत १० गतेबाट कुनै पनि देशका विमानले नेपालमा उडान भर्न नपाउने गरी प्रतिवन्ध लगाइएको थियो ।

तर मन्त्रिपरिषद बैठकको निर्णय सार्वजनिक भएपछि पहिलोपटक संस्कृति, पर्यटन तथा नागरिक उड्डयन मन्त्रालयले ८ देशमाथिको उडान प्रतिवन्ध खुला गर्ने निर्णय गरेको हो । तत्कालका लागि मलेसिया, टर्की, दक्षिण कोरिया, जापान, चीन, हङकङ, यूएई र कतारमा नेपालले नियमित उडान भर्नेछ । भदौ १६ बाट शुरुमा यी देशमा नियमित उडान हुनेछन् ।

यी देशबाट पनि पर्यटक र गैरआवासीय नेपाली भने अहिले नेपाल आउन पाउने छैनन् । नेपाली नागरिक, कूटनीतिक नियोगका कर्मचारी, विकास साझेदारी संघ संस्थाका कर्मचारी तथा प्रतिनिधि सरकारी आमन्त्रणमा आउने व्यक्तिले मात्र नेपाल प्रवेश गर्न पाउनेछन् ।

सरकारले अनअराइभल भिसा बन्द गरेका कारण सबै व्यक्तिले नेपाल आउनका लागि सम्बन्धित मुलुकको दूतावासबाटै भिसा लिनुपर्ने गरी उडान तालीका तय भएको छ । सरकारले स्वदेशी दुई वायुसेवा कम्पनीलाई कुल २९ वटा उडानको अनुमति दिएको छ । त्यसमध्ये नेपाल एयरलाइन्सको भागमा १७ र हिमालयको भागमा १२ उडान परेको छ । विदेशी वायुसेवा कम्पनीले भने ३१ वटा उडानको अनुमति पाएका छन् ।