ट्रम्पको चेतावनीपछि टिकटकका सीईओले दिए राजीनामा

११ भदौ, एजेन्सी । पछिल्लो समय निकै लोकप्रिय बनेको टिकटकका प्रमख कार्यकारी अधिकृत सिइओ केभिन मयेरले तीन महिनामै राजीनामा दिएका छन् । पछिल्ला साताहरूमा देखिएको तीव्र राजनीतिक परिवर्तनका कारण उनले राजीनामा दिएका हुन् । टिकटक यसअघि भारतमा प्रतिबन्ध लगाइएको थियो भने हालै अमेरिकामा पनि बन्द गर्ने चर्चा छ ।

मयेर डिज्नी छोडेर गत जुन १ देखि टिकटकको सिइओ बनेका थिए। चिनियाँ कम्पनी बाइटडान्सको स्वामित्वमा रहेको टिकटक पछिल्लो समय संसारभर युवा पुस्तामा लोकप्रिय भएको छ। अमेरिका पनि यसको लोकप्रियता बढ्दो छ। लोकप्रियता बढेसँगै टिकटक अमेरिका र चीनबीचको राजनीतिक मुद्दा बनेको छ।

अमेरिकी राष्ट्रपति डोनाल्ड ट्रम्पले टिकटकले प्रयोगकर्ताहरूका विवरण बेइजिङको सरकारलाई बुझाउने दाबी गर्दै यो अमेरिकाको राष्ट्रिय सुरक्षाका लागि खतरा भएको बताएका छन्।

उनले अमेरिकी कम्पनीहरूलाई टिकटकसँग कारोबार नगर्न ४५ दिने अल्टिमेटम दिएर कार्यकारी आदेशमा हस्ताक्षरसमेत गरिसकेका छन्। टिकटकले ९० दिनभित्र अमेरिकी कम्पनीलाई स्वामित्व हस्तान्तरण नगरे प्रतिबन्ध लगाउने ट्रम्पको घोषणा छ।