कोरोना, आक्रोश र राज्य  

बिगार्न सहज छ । जताततै बिगार्याै, हरेक क्षेत्र अस्तव्यस्त हुन थालिसक्यो ! के यही उद्देश्य प्राप्तिका लागि बेचिएका थियौं तिमी, तिम्रो विवेक अनि तिम्रो निष्ठा ? कस्तो राष्ट्रवाद हो तिम्रो ?  न त तिमीलाई निरीह गरिब जनताको चिन्ता छ न त तिमीलाई देशको माटोको सुरक्षाको मतलव छ, छ त केवल पैसासँग मतलव छ, भ्रष्टाचार गरि अकुत सम्पत्ति आर्जन गर्नु सँग छ ।

तिम्रो व्यक्तिगत अहंमको, सनकको खामियाजा देशका गरिब र निमुखा जनताले भोग्नु पर्ने ? कुन मोडलको राष्ट्रवाद हो यो ?  तिमी र तिम्रा आश्रित प्रशिक्षित झारहरूले दुईबित्ता उफ़्रिएर भाषण गर्दा तलतिर बग्ने खोलालाई माथितिर बग्ने बनाई देलान् । एकछिनको लागि पार्टीका गुलामहरूले पररर ताली पनि बजाउलान् महोदय  ! तर यथार्थमा त्यो असम्भव हुन्छ ।

मन्त्रालय, सुरक्षा निकाय, न्यायपालिका, कार्यपालिका,  व्यवस्थापिका सरकारको यस्तो कुन चाँहि अङ्ग स्वतन्त्र र चलायमान छ वर्तमानमा । अनि चरम अव्यवस्था नभएर अरु के हुन्छ त ? जुन अहिले देखिएको छ । के देशलाई विकास र जनतालाई सम्वृद्धि तिर लैजाने बाटो यही हो त महोदय ? के हामी यही बाटोमा निरन्तर अघि बढ्यौ भने हाम्रो गन्तव्यमा पुग्छौं त सरकार ? वेथितिको यात्राले हामी र हाम्रो राष्ट्रलाई रसातलमा बाहेक अन्यत्र कहीं लग्दैन  । यो कुराको चेतना होस् महोदय ! भनाईपनि छ, कुतीको बाटो हिडेर काँशी पुगिन्न !

वर्तमानमा विश्व, अझै दक्षिण एशियामा युद्धको कालोबादल मडारिएको कुरा त महशुस होला नै  । राष्ट्रियता बेचेर पाएको, कमाएको वा लिएको अरवौं रुपैयाँ लिएर जान्छौ कहाँ ? इतिहासमा लेन्डुप दोर्जेहरुको हविगत पढे सुनेकै छौँ, दलाई लामाहरुको प्रवासी जीवन आँखै अगाडि जीवन्त छ । यसभन्दा फरक अवस्था तिम्रो पनि हुनेवाला छैन, फरकै भएछ भने चाउचेस्कीको जस्तो होला । अन्य विकल्प त म देख्दिन महोदय !

सरकार आफ्नो अस्तित्व मदमस्त राँगो, बोका वा ब्रोइलर कुखुराको भाले भन्दा माथि उठाउने कोशिश गर्नुहोस । आजकै मितिबाट नत्र धेरै जसो गाईडेड मिसाईलहरु पनि प्राय जसो हावामै नष्ट हुन्छन आजको २१ औ शताब्दीमा ! उग्रराष्ट्रवाद  र छद्म राष्ट्रवाद बीचको झिनो भिन्नता तपाईका वृद्ध नजरले स्पष्टसँग खुट्यायनन् शायद  । त्यहि पर्खालको एकापट्टी हिटलर मुसोलिनोहरु हुन्छन भने अर्को पट्टी प्रचण्ड बाबुराम लगायत तपाई हुनुहुन्छ । देश उत्तर वा दक्षिण कता मर्ज हुने हो भन्ने जगजगीको स्थिति छ । विधिवत रुपमै सिक्किम विलय गराउन सक्ने कुटनीति र शक्तिको नशामा तिब्बत कप्लक्क पार्ने दुष्टहरूका बीच निरीह अवस्थामा छौँ हामीहरु ।  तसर्थ मोदीले दिशापिसाव गरेको जानकारी आउँदा मोदीको रिस फेर्न दिशापिसाव नरोक्नुस न त । जीनपीङ शाैचालय गएको जानकारी पाउना साथ हतारिएर शाैचालय कुद्ने वानी पनि छोड्नुस !

तपाईका विश्वासपात्र तपाइकै पार्टीका सहकर्मीहरुले तपाइको अवस्था बुख्याँचा जस्तो बनाएका छन् ! कतिनै बाँच्नु होला र मृगतृष्णामा भौतारिन छोडेर गरिब जनताको हकहितमा ध्यान केन्द्रित गर्नुस । अझै समय घर्की सकेको छैन ।

नेपाली जनताको अनौठो चरित्र छ । जसरी तपाईले बाँढेको रक्सीमासुले तपाईलाई सत्तामा पुर्यायो, त्यसको नशा सकिएपछि जुर्मुर्याउदैनन भनेर ढुक्क नहुनुस । बेलारुसको अवस्था हामीकहाँ पनि आउन सक्छ कुनैपनि बेला । होशियार हुनुपर्ने बेला भयो कि अब ? सरकार सत्ताको नशामा my way is highway भन्दै उल्टो बाटो कुदेको छ, त्यसैले दुर्घटना अवश्यमभावी छ ! भुरेटाकुरे पार्टीको कुरा छोड्ने हो भने बाँकी रहेको एउटै प्रजातान्त्रिक पार्टी नेपाली कांग्रेस लोकल भाले उपनामले चिनिने देउवा जस्ता लम्पटको पन्जामा जेलिएको छ र त तपाईले फालेको कनिका टिप्नमा ब्यस्त छन् । अन्यथा प्रतिपक्षले सरकारका गलत क्रियाकलाप रोक्ने जमर्को गर्थ्यो होला । यसरी प्रतिपक्षको भूमिकाविहिन स्थिति कतिन्जेल रहला र मान्यवर ? चेतना भया !

• फ्र्यांक्फ्र्ट, जर्मनी