नेप्सेको साइटमा आज पनि समस्या, लगानीकर्ता ‘क्लोजआउट’ पर्ने तनावमा

१४ भदौ, काठमाडौं । नेपाल स्टक एक्सचेञ्जले ट्रेड म्यानेजमेन्ट सिस्टम (टीएमएस) मा समस्या आएको जनाएको छ । सिस्टममा समस्या देखिएपछि शेयर कारोबार स्थगित भएको छ ।

नेप्सेले एक सुचना जारी गर्दै भनेको छ : नेप्से कारोबार व्यवस्थापन प्रणालीमा केही प्राविधिक समस्या आएकोले हाल कारोबार रोक्का राखिएको छ । हामी उक्त समस्या समाधानका लागि प्रयासरत छौं । यसबाट पर्न गएको असुविधाप्रति क्षमाप्रार्थी छौं । बजार खुलेको एक घण्टाको अवधिमा नेप्से परिसूचक ११.७९ अंकले घटेर १४४६.२४ अंकमा आइपुगेको छ ।

लगानीकर्तालाई तनाव

पटक पटक नेप्सेको साइटमा समस्या आउने भएपछि लागानीकर्तालाई तनाव सिर्जना भएको छ । नेप्से अनलाईन साइटमा देखिएको यो पहिलो समस्या भने होइन । यसअघि पनि धेरै पटक साइटमा समस्या आएका थिए । समस्या आयो भनेर नेप्सेलाई भन्दा, सामान्य र रेडिमेट जवाफ छ, अनलाईन सिस्टम हो बेला बेलामा समस्या आइरहन्छ । तर यही बेला बेलामा आउने समस्याले लगानीकर्ता भने हैरानीमा छन् ।

आज शेयर ब्रोकरहरुको टीएमएसमा उत्पन्न समस्याका कारण लगानीकर्ताहरु क्लोज आउटमा पर्ने अवस्थामा पुगेका छन् । अनलाईन कारोबार प्रणालीले खातामा नभएको शेयर बिक्री गर्नबाट बञ्चित गर्ने भनिए पनि आइतबार खातामा नभएको शेयर समेत बिक्री भएको भेटिएको देखिएको छ ।

आज बजार खुलेको केही समयमा नै टीएमएसमा डाटा लोड नहुने, अर्डर प्लेस भएको देखाउने तर अर्डर बुकमा कुनै विवरण नदेखाउने तथा डाटा लोड नहुने समस्या देखिएको थियो । एक पटक राखेको अर्डर धेरै पटक कारोबार भएको देखाउने जस्ता समस्या देखिँदै गर्दा अनलाइन प्रणालीले टीएमएसमा सञ्चित नभएको शेयर समेत बिक्री गराएको छ । जसका कारण क्लोज आउटमा परिने हो वा होइन भन्ने अन्यौलता लगानीकर्तामा देखिएको छ ।