पर्यटन दशक प्रस्ताव मन्त्रिपरिषदबाट अस्वीकृत, पर्यटनमन्त्री असफल !

१७ भदौ, काठमाडौं । कोरोना कहरबीच विश्व ठप्प भएका बेला सरकारको ‘भ्रमण वर्ष २०२०’ असफल भइसकेको छ । पर्यटन बर्षको बदलामा पर्यटक दशक कार्यक्रम चलाउने पर्यटन मन्त्रालयको प्रस्ताव मन्त्रिपरिषद बैठकबाट फिर्ता भएको छ ।

संस्कृति, पर्यटन तथा नागरिक उड्डयन मन्त्री योगेश भट्टराईले ल्याएको ‘पर्यटन दशक २०२१ २०३०’ कार्यक्रम मन्त्रिपरिषद बैठकले अस्वीकृत गरेर फिर्ता गरेको हो । पर्यटन मन्त्रालयले चालु आर्थिक वर्षको नीति तथा कार्यक्रम र बजेटमा समेत पर्ने भनी प्राथमिकताका साथ प्रचार गरेको यो कार्यक्रमको प्रस्ताव मन्त्रिपरिषद्बाटै फिर्ता भएपछि मन्त्री भट्टराई पनि असफल भएको चर्चा हुन थालेको छ ।

असारको शुरुमै बसेको मन्त्रिपरिषद् बैठकले मन्त्री भट्टराईले प्रस्ताव गरेको ‘पर्यटन दशक २०२१/२०३०’लाई फिर्ता गर्ने निर्णय गरेको हो । सरकारले बार्षिक २० लाख पर्यटक भित्र्याउने लक्ष्यसहित शुरु गरेको भ्रमण वर्ष २०२० कोरोनाका कारण स्थगित हुँदा पर्यटन दशक समेत असफसल भएको छ । यसले पर्यटनमन्त्री भट्टराईको काम भन्दा गफ बढी भएको स्पष्ट देखिन्छ ।