बामदेव ओलीको गलगाँड
नेपालबहस संवाददाता
भदौ १९, २०७७ शुक्रबार २०:२५:०
१९ भदौ, काठमाडौं । नेपाली राजनीतिमा गज्जबको पात्र हुन् बामदेव गौतम । क्रान्तिकारी स्वरुपमा प्रस्तुत हुने उनको शैली अन्ततः सत्ताको चास्नीमा चुर्लम्मै डुब्ने गरेको छ । सत्ता भन्दा बाहिर टिक्नै नसक्ने उनको चरित्र हो । त्यसैले १८ पल्टको अनवरत प्रयासपछि अन्ततः आज उनी संघीय संसद राष्ट्रियसभाको सदस्यमा मनोनित कोटामा पर्ने निश्चित भएको छ ।
आज बसेको मन्त्रिपरिषद बैठकले गौतमलाई रिक्त पदका लागि मनोनयन गर्न राष्ट्रपति समक्ष सिफारिश गर्ने निर्णय गरेको छ । गत आम निर्बाचनमा बर्दियाबाट उम्मेदवार रहेका गौतम नेपाली कांग्रेसका प्रत्याशी सञ्जय गौतमसँग केवल ७५३ मतान्तरले पराजित भएका थिए । देशैभरि वाम गठबन्धनको उभार आएका बेला गौतमले भने अन्तर्घातका कारण पराजय भोग्नुपरेको थियो । त्यसयता उनले संसद्मा छिर्न अनेक टिकडम लगाए । तर प्रधानमन्त्री केपी ओलीले उनको चाहनामा सधैं तगारो लगाइदिए ।
अहिलेपनि प्रधानमन्त्रीको चाहनाले गौतम सांसद भएका होइनन् । यो सारा लोकलाई थाहा छ । स्वयं गौतम यसबारे वाकिफ छन् । ओलीले अन्तिम समयसम्मै आफ्ना विश्वासपात्र डा. युवराज खतिवडालाई ल्याउन चाहे । तर पार्टी भित्रको समीकरणमा फेरबदल आएपछि त्यसलाई मिलाउन उनले यसपाला भने गौतमको चाहनालाई क्रस गर्न सकेनन् ।
गौतमको विगत
सत्तामा मात्र रमाउने गौतम चरित्र नेपाली राजनीतिमा रुची राख्ने सबैलाई राम्रो हेक्का छ । ०५१ सालमा एमालेले अल्पमतको सरकार बनाएपछि उनी पार्टीको उपमहासचिव भए । तर सर्वाेच्च अदालतले मनमोहन अधिकारीले गरेको मध्यावधिको सिफारिशलाई अस्वीकार गरेपछि नेपाली राजनीतिमा गौतमको इन्ट्री धमाकेदार रह्यो । शेरबहादुर देउवा नेतृत्वको सरकारमा सहभागी राप्रपा भित्र गौतमले राम्रो खेले ।
उनले लोकेन्द्रबहादुर चन्दलाई प्रधानमन्त्री बनाउने प्रस्ताव पार्टीबाट पास गराए । उक्त मन्त्रिमण्डलमा उनी उपप्रधानमन्त्रीसहित गृहमन्त्री बने । त्यसपछि त उनले नेपाल प्रहरीलाई पार्टीको नोकर नै बनाए । ३६ औं दिनमै उनले प्रहरी महानिरीक्षक अच्युतकृष्ण खरेललाई हटाएर कनिष्ठलाई ल्याए । त्यसयता उनको सत्तामोहको यात्रा अबिराम जारी छ ।
देउवा सरकारले प्रस्ताव गरेको महाकाली सन्धिमा तत्कालिन एमालेले साथ दिने निर्णय गरेपछि गौतम विच्किए । उनले एमालेलाई भारतीय दलाल भन्दै नेकपा माले गठन गरे । तर लामो समय उनी त्यहाँ टिक्न सकेनन् । उनको राष्ट्रवादी नारा त्यसै सेलायो । त्यसैताका एमालेले टुंडिखेलमा आमसभा गरी देशको नम्बर एक भ्रष्टाचारीमा गौतमलाई घोषणा गरेको थियो । नेता प्रदीप नेपालले गौतमले एयरपोर्टबाट सुन तस्करीदेखि विभिन्न तस्करी काण्डमा वितण्डा मच्चाएको भन्दै उक्त उपमा दिएका थिए ।
त्यसबेला भएको आम निर्वाचनमा उनको पार्टीले एक सीट पनि जित्न सकेन । अनि आफैंले बनाएको नेकपा माले मैनाली दाजुभाईलाई जिम्मा लगाएर उनी एमालेमै छिरे । किनभने एमालेमा मात्रै सत्ताको चार्म थियो । त्यसपछिका हरेक घटनाक्रममा गौतम अस्थिर र सत्ता केन्द्रित देखिएका छन् । ओलीको राजीनामा माग्ने प्रकरणमा पनि उनी कहिले यता त कहिले उता देखिए । उनको अस्थिर चरित्रले गर्दा कसैको पनि विश्वास जित्ने अवस्था छैन् ।
ओलीका लागि घाँडो
विगतमा ओलीलाई गौतमले साथ र सहयोग नगरेका होइनन् । तर सबैको मूल्य उनले चाहेका छन् । बर्दियाबाट चुनाव जितेका थिए भने गौतमले ओलीलाई उहिल्यै हायलकायल बनाइसक्थे । किनभने समकालिन नेताहरुमा प्रधानमन्त्री हुन बाँकी उनी मात्रै छन् । अर्का अध्यक्ष पुष्पकमल दाहाल र नेता माधवकुमार नेपालको लहैलहमा लागेर उनले ओलीको झाँको झारिसक्ने थिए । तर उनी पराजित भइदिए । गौतमको बुझाईमा उनलाई हराउने काम पनि ओली पक्षबाटै भएको थियो । त्यसको भनक उनले ओलीलाई दिइसकेका छन् ।
गौतम राष्ट्रियसभामा बसेर विधेयकको ड्राफ्ट कोर्ने खालका मानिस होइनन् । उनी सांसद् हुनु भनेको सरकारमा जान नै हो । त्यसको संकेत उनले गरिसकेका छन् । अब अर्थ मन्त्रालयसहित उपप्रधानमन्त्रीको कुर्सी उनले ताकेका छन् । तर ओली कुनैपनि हालतमा त्यो मान्नेवाला छैनन् । तर सांसद भइसकेपछि गौतमलाई मन्त्रिमण्डलमा नलगी ओलीलाई सुखै हुने छैन । किनभने प्रचण्ड र नेता नेपालले ओलीलाई कमजोर बनाउनकै लागि भएपनि गौतमलाई मन्त्रिमण्डलमा सिफारिश गर्ने अवस्था छ । त्यसैले सांसद भएका गौतम ओलीका लागि भोलिदेखि नै घाँडो हुने देखिन्छ ।
गौतमको भूमिका
राजनीतिमा अस्थिर चरित्रको छवि बनाएका बामदेव अहिले ओलीसँग निकट रहने रणनीतिमा हुनेछन् । तर ओलीले मन्त्री नबनाएको अवस्थामा भने खटपट सुरु हुने निश्चित छ । गौतमको स्वभाव र चरित्रबारे राम्रो जानकारी भएका नेताहरु प्रचण्ड र नेपाल पनि त्यही मौकाको ताकमा छन् ।
ओलीसँग चिढिएको अवस्थामा फेरि गौतमको महत्वाकांक्षा बढाएर सरकारलाई अस्थिर बनाउने उनीहरुको योजना रहनेछ । त्यसैले अबको केही महिना भित्रै ओली र गौतमबीच फेरि मनमुटाव सुरु हुने देखिन्छ । तर ओलीले बामदेव पत्नी तुलसा थापालाई मन्त्रिमण्डलमा ल्याएर थामथुम पार्ने प्रयास गर्न सक्छन् । तर बामदेव आफैं सकृय हुन चाहन्छन् । उनले ओलीलाई भेटेरै यसबारे अवगत गराइसकेका छन् । त्यसैले श्रीमतीलाई नभई आफैंलाई मन्त्री बनाउन उनको जोडबल रहने देखिएको छ ।
ओली पनि गौतमसँगै मिलेर जाने मनस्थितिमा पुगेको अवस्थामा पनि अर्थमन्त्रालयको जिम्मेवारी भने नदिनेमा दृढ छन् । त्यसैले अरु कुनै विकास निर्माण सम्बन्धी मन्त्रालय दिएर गौतमलाई थामथुम पार्ने दाउमा ओली लाग्न सक्छन् । तर गौतम भने अब सामान्य खालका मन्त्रालय लिएर नजाने पक्षमा अडिग हुन सक्छन् । जे भएपनि ओली र गौतमबीचको अस्थायी युद्धविराम केही समयमै तोडिन सक्छ ।
विष्णु पौडेलको संभावना
कदाचित बामदेव अर्थमन्त्री भएनन् भने विष्णु पौडेलको संभावना रहेको छ । आफू नहुने अवस्थामा गौतमकाे समेत पौडेललाई साथ रहने छ । पौडेल मन्त्री भएको अवस्थामा डा. खतिवडाले समेत सघाउने छन् । प्रधानमन्त्रीको मुख्य आर्थिक सल्लाहकारको रुपमा डा. खतिवडा नियुक्त हुनसक्ने सम्भावना रहेको छ । तर त्यसो हुनका लागि पौडेल नै अर्थमन्त्री हुनुपर्ने डा. खतिवडाको शर्त रहेको छ । उता, प्रचण्ड र माधव पक्ष भने सुरेन्द्र पाण्डेलाई नै अर्थको जिम्मेवारी दिनुपर्ने पक्षमा रहेका छन् । संभवतः यही हप्ता मन्त्रिमण्डल पुनर्गठन हुन सक्ने संभावना रहेको स्रोतको दाबी छ ।
नेपालबहस संवाददाता
नेपालबहस डटकमको अंग्रेजी संस्करणका साथै अनलाइन टीभी पनि सञ्चालित छ । फेसबुक र ट्वीटरमार्फत पनि हामीसँग जोडिन सकिनेछ । नेपालबहसमा प्रकाशित कुनै सामग्रीबारे कुनै गुनासो, सूचना तथा सुझाव भए हामीलाई [email protected] मा पठाउनु होला । धन्यवाद ।
लेखकबाट थपभारतीय मूलका विनोद चौधरीका कर्तुत खोजिँदै, कसरी छिरे नेपाल ?
जेठ ११, २०८१ शुक्रबार
यस्तो छ सहकारीको शिर, दलीय वर्चश्वमा एमाले !
जेठ १०, २०८१ बिहिबार
रविको निशानामा देउवाको परिवारः आरजु र छोरा जयवीर माथि अनुसन्धानको तयारी
जेठ ९, २०८१ बुधबार
भारतीय मूलका विनोद चौधरीका कर्तुत खोजिँदै, कसरी छिरे नेपाल ?
नेपालबहस संवाददाता
जेठ ११, २०८१ शुक्रबार
के तपाईको हातमा पैसा जोगिदैन ? यी तरिकाहरु अपनाउनुस् !
नेपालबहस संवाददाता
जेठ १२, २०८१ शनिबार
फेरिए नारायणी अस्पतालको मेसु, डा.एनामुलले पाए जिम्मेवारी
आबिद हुसेन
जेठ १३, २०८१ आइतबार
भारतीय कारखानामा विस्फोट : मृत्यु हुनेको संख्या ११ पुग्यो
नेपालबहस संवाददाता
जेठ ११, २०८१ शुक्रबार
फेरिए नारायणी अस्पतालको मेसु, डा.एनामुलले पाए जिम्मेवारी
जेठ १३, २०८१ आइतबार
अस्पतालमा आगलागी हुँदा सात नवजात शिशुको मृत्यु
जेठ १३, २०८१ आइतबार
तराईमा केही दिन अत्यधिक गर्मीको सम्भावना, सतर्कता अपनाउन अनुरोध
जेठ १३, २०८१ आइतबार
शिर्ष नेताको बैठकमा कार्यादेश बारे जुटेन सहमति, आजै फेरी छलफल हुने
जेठ १४, २०८१ सोमबार
सिरोहिया पक्राउ बारे बोलेका मह जोडीले चौतर्फी आलोचना भएपछि आलोचनापछि मागे माफी
जेठ १४, २०८१ सोमबार
बजेटको करिब १५ प्रतिशत रकम सामाजिक सुरक्षामा खर्च
जेठ १४, २०८१ सोमबार
‘लहान एक्पो’ मा एक करोड ५९ लाखभन्दा बढी कारोबार
जेठ १४, २०८१ सोमबार
कांग्रेस आफ्नो अडानमा अडिग छ, सरकारमा जाने हतारो छैन : नेता डा कोइराला
जेठ १४, २०८१ सोमबार
गोरखाको साम्दोमा सशस्त्र प्रहरीको ‘बोर्डर आउट पोष्ट’ स्थापना
जेठ १४, २०८१ सोमबार