देउवा र पौडेलबीच विवाद चर्किदो

२० भदौ, काठमाडौं । कांग्रेस सभापति शेरबहादुर देउवा र वरिष्ठ नेता रामचन्द्र पौडेल पक्षबीच विवाद चर्किएको छ । कांग्रेस विभागहरुमा देउवाले एकलौटी मनोनयन गरेपछि पौडेल पक्ष असन्तुष्ट बनेको हो ।

यसका लागि थप छलफल गर्न पौडेल पक्षले केन्द्रीय सदस्यहरुको जुम मिटिङ बोलाएको छ । जसबाट निर्णय फिर्ताको लागि सभापति देउवालाई दबाब दिने रणनीति छ ।

केन्द्रीय सदस्य गुरुराज घिमिरेले आजको छलफलमा दबाबमुलक कार्यक्रम गर्नेबारे छलफल हुने बताए । सभापति देउवाले बुधबार र बिहीबार थप २ विभागमा ९६ जनालाई मनोनयन गरेका थिए । देउवाले हालसम्म २० वटा विभागमा करिब ९ सय नेता, कार्यकर्ताहरुलाई मनोनयन गरेका छन् । यी मनोनयन एकलौटी भएको भन्दै पौडेल पक्षले विरोध गर्दै आएको छ ।

पौडेल पक्षले विभाग गठन, क्रियाशील सदस्यता वितरण र भ्रातृसंस्थाको कार्यकाल थपका विषयमा असन्तुष्टि जनाएको छ । महाधिवेशनको आचारसंहिता र विधान विपरीत विभागहरु गठन गरिएको भन्दै पौडेल पक्षले तिनलाई खारेज गर्न माग गर्दै आएको छ । तर देउवाले त्यसलाई सुनेका छैनन् ।