नापीका देशद्रोही कर्मचारीलाई उत्कृष्ट निजामति पुरुस्कार !

२१ भदौ, काठमाडौं । देशमा केपी ओली नेतृत्वको सरकार छ । दुई तिहाई समर्थन प्राप्त सरकार शासकीय दृष्टिकोणमा हरेक पाटोमा असफल छ । त्यसैको प्रतिबिम्ब हरेक क्षेत्रमा उजागर भइरहेका छन् । यसैक्रममा देशद्रोह जस्तो जघन्य अपराधकाे आरोप लागेकालाई ओली सरकार दण्डित गर्नुको बदला पुरष्कृत गर्दैछ ।

त्यो उच्च सम्मान र पुरष्कार पाउने व्यक्ति हुन्– नापी विभागका महानिर्देशक प्रकाश जोशी । उनी भोलि निजामती सेवा दिवसमा उत्कृष्ट कर्मचारीका रुपमा पुरष्कृत हुँदैछन् । जोशी के काम गरेवापत् पुरष्कृत हुँदैछन् त भन्दा देश बेचेकाे आरोप लागेवापत । नेपाल र भारतीय सीमा क्षेत्रको हरेक वर्ष नापी सर्वेक्षण हुने गरेको छ । यसैक्रममा पश्चिम नेपालको कञ्चनपुर क्षेत्रमा पर्ने सीमाको समेत सर्वेक्षण गरिन्थ्यो ।

तर ०५८ सालदेखि ०६० सालसम्म नेपाली टोलीले आफ्नो क्षेत्रमा पाइला नै नटेकी नापी सर्वेक्षण ग¥यो । सो टोलीको नेतृत्व गर्ने व्यक्ति र टोलीमा को को थिए भन्ने हालसम्म नखुलाईए पनि सोे टोलीले भारतीय पक्षले तयार गरेको “स्ट्रिप नक्शा” लाई नै आधिकारिक भनी सहीछाप गरेर आयो । त्यस अवधिभर नेपाली टोली भारतीय भूमिमै बस्यो । सम्बन्धित जिल्लाका सत्तारुढ नेकपाकै सांसदहरुले बिरोध जनाईरहेको सो नक्सालाई हालका महानिर्देशक जोशीले यस आर्थिक बर्षमा पनि सदर गरेपछि उनको देशद्रोही भेष उदाङगो भएको नापी विभाग स्रोतको भनाई छ । यसबारे महानिर्देशक जोशीसँग प्रतिक्रिया लिन नेपालबहस डटकमको दुई दिनसम्मको लगातारको प्रयास सफल हुन सकेन् । जोशीको मोवाइल नम्बरमा फोन गर्दा नत उनले फोन नै उठाए नत कलब्याक नै गरे ।

त्यतिबेला नेपालमा माओवादीले सशस्त्र द्वन्द्व सञ्चालन गरेको भन्दै नापीको टोलीले भारतीय पक्षले तयार गरेको सर्वेक्षणमा सहीछाप गरी फर्कियो । तर त्यसो गर्दा नेपालले हजारौं विगाह जमिन गुमाउनु परेको छ । अहिले नेपाली भूमि भारतीय नक्शामा परेको छ । यद्यपि यसको आधिकारिकता भने द्विदेशीय हस्ताक्षर गरेपछि मात्र हुनेछ । तर नापीकोे टोलीले गरेको लापरवाहीले देशले ठूलो मूल्य चुकाउनुपर्ने अवस्था सिर्जना भएको छ । यसमा करेक्सन गर्नेतर्फ जोशीले कुनै तदारुकता देखाएका छैनन्, उल्टै हरेक बर्ष त्यसैलाई सदर गर्दै गईरहेको विभाग स्रोतले दावी गरेको छ ।

जोशीका कर्तुत

हाल नापी विभागमा महानिर्देशक बन्न सफल जोशी सधैं विवादास्पद कर्मचारी मानिन्छन् । भ्रष्टाचार र अनियमिततामा उनी सबैलाई उछिन्ने कीर्तिमानी कर्मचारी मानिन्छन् । बैतडी जिल्ला स्थायी ठेगाना रहेका जोशी हरेक पार्टीका नेताहरुसँग साँठगाँठ मिलाउन सिपालु मानिन्छन् । समाचार स्रोतका अनुसार उनी विदेशी शक्ति केन्द्रसँगसमेत निकट सम्बन्ध राख्ने खुबी भएका कर्मचारी हुन् ।

नापी विभागका एकजना उच्च कर्मचारीले नाम नबताउने शर्तमा नेपालबहस डटकमसँग भन्छन् “त्यसको छनक उनले सरकारले जारी गरेको नेपालको नयाँ नक्शा प्रकरणमा समेत दिए । भारतीय दूतावासका फ्रस्र्ट सेक्रेटरी ( शर्माजी ) सँग उनको हिमचिम राम्रै छ । उनीमार्फत नेपालका हरेक सूचना शर्माजीले पाउने गरेका थिए । नेपालले नयाँ नक्शा जारी गर्न लाग्दा सरकारी तहबाट भइरहेका सबै कामबारे उनले भारतीय दूतावासमा रिपोर्टिङ गर्ने गर्थे । उनै सेक्रेटरीले मन्त्रीलगायत नेपाली पदाधिकारीहरुलाई फोन गरी सबै कुरा सुनाउने गर्थे ।” त्यति धेरै पहुँच भएका जोशीलाई सरकारले उत्कृष्ट कर्मचारी पुरष्कार दिइरहेको छ ।

सरोकारवालाहरुको विरोध

सीमा क्षेत्रमा दुवै मुलुकका नापीका कर्मचारी बसेर गरिने सर्वेक्षण एकपक्षीय भएको र नेपाली टोलीले गद्धारी गरेको भन्दै सरोकारवालाहरुले आपत्ति जनाएका छन् । सर्वेक्षणका बेला नेपाली पक्षका नापी कर्मचारीले नेपाली भूमिको सर्वेक्षण नगरी भारतीय पक्षले तयार गरेको “स्ट्रिप नक्शा” मा हस्ताक्षर गरेर देश बेच्ने काम गरको भन्दै कारबाही गर्न आग्रह गरेका छन् । नापी विभागका केही भ्रष्ट र कामचोर कर्मचारीको लापरबाही र कमजोरीका कारण कञ्चनपुर जिल्लामा पर्ने भारतीय सीमासँग जोडिएका हजारौं बिगाहा जमिन र गाउँवस्तीसमेत भारतीय पक्षको कब्जामा पुगेको खुलेपछि सरोकारवालाहरुको विरोध चुलिएको हो ।

कञ्चनपुरको सोही क्षेत्रबाट प्रतिनिधित्व गर्ने नेकपाका सांसद नरबहादुर धामीले सरकारी कर्मचारीको लापरवाहीका कारण नेपालले त्यत्रो जमिन गुमाउने अवस्था सिर्जना भएको बताए । उनले भने– कर्मचारीको लापरवाहीले हामीले बर्सेनि लाखौं रुपैयाँ कमाउने एउटा तालसमेत गुमाउनुपरको छ । हाल भारतले आफ्नो भूमि भनी दाबी गरेको उक्त पोखरीमा स्थानीय सरकरले बर्सेनि माछापालन गर्दै आएको थियो । जिल्ला विकास समितिको स्वामित्वमा रहेको उक्त पोखरी अहिले भारतले आफ्नो भन्न थालेको भन्दै यसबाट नेपालले आफ्नो सम्पति गुमाउनुपरेको जानकारी दिए ।

नापीका कर्मचारीले गल्ती गर्दा देशले त्यत्रो नोक्शानी ब्यहोर्ने भन्ने कुरा आउँदैन भन्दै सांसद धामीले गल्ती गर्ने कर्मचारीलाई देशद्रोही घोषित गरी तत्काल बर्खास्त गर्नुपर्ने माग गरे । नेपालको भूमि भएपनि भारतीय पक्षले भोगचलन गरिरहेको जानकारी दिंदै उनले उक्त नक्शा तत्काल खारेज गरी पुन सर्वेक्षण गरिनुपर्ने बताए । नेपालको नून खाएर भारतको सोझो गर्ने कर्मचारीहरुलाई कारबाही गरेर सरकारले दण्डहिनता अन्त्य गर्नुपर्ने उनको भनाई छ ।

उक्त गलत नक्शा तत्काल सच्याउन कञ्चनपुरका स्थानीय जनप्रतिनिधिलगायत सरकारी प्रतिनिधि सम्मिलित पदाधिकारी बोलाएर गत बुधवार संसदको राज्य व्यवस्था तथा सुशासन समितिमा छलफल भएको थियो । यसैगरी, अन्तर्राष्ट्रिय सीमा सरोकार समिति, कञ्चनपुरका संयोजक पल्लबराज भट्टले पनि नापी कर्मचारीका त्रुटीका कारण नेपालले समस्या भोग्नुपरेको बताए ।

नापीका कर्मचारीले जानेर वा नजानेर भएपनि ठूलो त्रुटी भएको छ, त्यसलाई तत्कालै सच्याउनेतिर जानुपर्छ – भट्ट भन्छन् ।
नेपाली स्वामित्वको जमिनको भोगचलन भारतले गर्ने अवस्था आएकाले नेपाल सरकार सजग हुनै पर्ने उनको तर्क छ ।नेपाली पक्षको नेतृत्व गर्ने टोली भारतमै बसेर उनीहरुले तयार गरेको स्ट्रिप नक्शामा हस्ताक्षर गरेकाले समस्या भएको उनको ठम्याई छ । त्यसमा नेपाली पक्ष चुकेकै हो, नियतवश हो वा नजानेर होस् तर नेपालले धेरै गुमाउनुपर्ने अवस्था आएको छ भन्दै संयोजक भट्टले पुरानो गल्ती तत्काल सच्याउनुपर्ने बताए ।