सप्तरीमा अदालत, विद्युतका कर्मचारीसहित थप १८ जनालाई कोरोना

◊ धीरुभाइ

२१ भदौ सप्तरी । सप्तरीमा अदालत, विद्युत, प्रहरीसहित आइतबार थप १८ जनामा कोरोना संक्रमण भेटिएको छ । संक्रमण पुष्टि भएकामध्ये दुई जना महिला छन । यो सँगै जिल्लामा अहिलेसम्म संक्रमितको संख्या ९१६ पुगेको छ । स्वास्थ्य कार्यालयका निमित प्रमुख दुनियालाल यादवका अनुसार आज थपिएका संक्रमितहरुमा सप्तरी अदालतका चार, विद्युत प्राधिकरण राजविराजका तीन, एक प्रहरी, राजविराज नगरपालिका र तिलाठी कोइलाडी गाउँपालिकाका पाँच÷पाँच जना रहेको छ ।

अदालतका ५२, २५, ३४ वर्ष र उमेर नखुलेका एक पुरुषमा कोरोना संक्रमण भेटिएकोे जानकारी दिए । राजविराज स्थित विद्युत प्राधिकरणका उमेर नखुलेका तीन पुरुष रहेको छन भने एक जना ३३ वर्षीय पुरुष प्रहरीमा कोरोना संक्रमण पुष्टि भएको स्वास्थ्य कार्यालय सप्तरीका शर्मिला चौधरीले जानकारी दिए ।

त्यस्तै राजविराज नगरपालिका वार्ड नम्बर ४ का ७० वर्षीय पुरुष, वार्ड नम्बर नखुलेको ३५ वर्षीय पुरुष, वार्ड नम्बर ७ का २७ वर्षीया महिला, वार्ड नम्बर २ का २२ वर्षीय पुरुष र १४ वर्षीया महिलामा संक्रमण भेटिएको उनले बताइन । उनीहरुको स्वाब परीक्षण गजेन्द्र नारायण सिंह अस्पताल राजविराजको कोभिड प्रयोगशालामा गरिएको स्वास्थ्य कार्यालय सप्तरीका वरिष्ठ मलेरिया इन्सपेक्टर नारायणप्रसाद राउत बरैले बताए ।