कोरोना लागेपछि होम आइसोलेसन, ज्यान गुमाउने बेला अस्पताल !

२२ भदौ, मोरङ । मोरङको विराटनगरमा होम आइसोलेसनमा बसेका कोरोना संक्रमितको मृत्यु भएको छ । १० दिनदेखि होम आइसोलेसनमै बसेका तर अन्तिम समय कोशी अस्पताल कोभिड–१९ उपचार केन्द्रमा पुगेका विराटनगर महानगरपालिका– १० का ७६ वर्षीय वृद्धको मृत्यु भएको हो ।

११ भदौमा कोरोना संक्रमण पुष्टि भएका उनी होम आइसोलेसनमा बसेका थिए । उच्च रक्तचापबाट पनि पीडित वृद्धको अवस्था गम्भिर बनेपछि शनिबार राति कोभिड–१९ उपचार केन्द्रमा भर्ना गरिएको थियो । श्वासप्रश्वासमा समस्या भएपछि गम्भिर अवस्थामा अस्पताल ल्याइएका वृद्धलाई भेण्टिलेटरमा राखिएको थियो ।

भेण्टिलेटरमा राखेर उपचार गर्ने क्रममा सोमबार बिहान साढे ३ बजे मृत्यु भएको हो । उनको मृत्युसँगै विराटनगरमा कोरोना संक्रमणका कारण ज्यान गुमाउनेको संख्या १५ पुगेको छ ।