जग्गा कित्ताकाटमाथिको प्रतिबन्ध फुकुवा

२२ भदौ, काठमाडौं । जग्गा जमीनको कित्ताकाटमाथिको प्रतिबन्ध सरकारले हटाएको छ । भूमि व्यवस्था तथा गरिबी निवारण मन्त्रालयले एक पत्र जारी गर्दै जग्गाको कित्ताकाटमाथि लगाइएको प्रतिबन्ध हटाएको जनाएको हो ।

मन्त्री पद्मा अर्यालले मन्त्रीस्तरिय निर्णय गर्दै शुक्रबारदेखि जग्गा कित्ताकाटमा लागेको प्रतिबन्ध हटाएको बताएकी छन् । मन्त्रालयले भूमि व्यवस्थापन तथा अभिलेख विभाग तथा नापी विभागलाई पत्राचार गर्दै जग्गा कित्ताकाटमा प्रतिबन्ध लगाउने निर्णय खुलाउने निर्णय गरेको हो ।

तीन वर्ष अगाडि भूमिसुधार मन्त्रालयले जग्गा कित्ताकाटमा लागेको प्रतिबन्ध हटाएको थियो । पछि स्थानीय निकायको अनुमतिमा जग्गाको कित्ताकाट खुलेपनि यो झन्झटिलो थियो ।

अख्तियार दुरुपयोग अनुसन्धान आयोगले जग्गा कित्ताकाटमा लागेको प्रतिबन्ध हटाउन सुझाव दिएपछि मन्त्रालयले खुलाएको हो । कित्ताकाटमाथि लागेको प्रतिबन्ध हटेपछि अब खुलेआम रुपमा जग्गा प्लटिङ गर्न पाइने भएको छ । जसबाट घरजग्गा व्यवसायी उत्साहित भएका छन् ।