कांग्रेसले बीपी जयन्ती तीन दिनसम्म भर्चुअल रुपमा मनाउने

२३ भदौ, काठमाडौं । नेपाली कांग्रेस केन्द्रले बीपी कोइरालाको १०७ औं जन्मजयन्ती भर्चुअल रुपमा मनाउने भएको छ।कांग्रेस केन्द्रीय कार्यालयका मुख्य सचिव कृष्णप्रसाद पौडेलले मंगलवार एक विज्ञप्ति जारी गर्दै तीन दिनसम्म भर्चुअल रुपमा वीपी जयन्ती मनाउने उल्लेख गरेका छन्।

“केन्द्रीय तहबाट तीन दिने कार्यक्रम तय गरिएको छ,” विज्ञप्तिमा भनिएको छ। जुममार्फत हुने कार्यक्रमको पहिलो दिन बुधवार एक बजे “बीपीको विचार नेपालको समुन्नतिको मुल बाटो” बिषयमा बहस हुनेछ।

यसैगरी भदौ २५ गते दिउँसो १ बजे नै ‘नेपालको अन्तर्राष्ट्रिय सम्बन्ध र विदेश नीतिमा वीपीको योगदान’ विषयमा विचार गोष्ठी हुने छ । केन्द्रीय नीति, अनुसन्धान तथा प्रशिक्षण प्रतिष्ठानले संयोजन गर्ने सो कार्यक्रममा उपसभापति विमलेन्द्र निधि र विज्ञहरुको सहभागीता रहने छ ।

यसैगरी भदौ २६ गते दिउँसो १ बजे नै ‘विचार निर्माण एवं प्रचारमा वीपीको शैलीको आलोकमा अबको रणनीति’ विषयमा विचार गोष्ठी आयोजना गरिने कांग्रेसले जनाएको छ । सूचना, संचार तथा प्रचार विभागले संयोजन गर्ने यो कार्यक्रममा नरहरी आचार्य, प्रदीप गिरिलगायतका नेताहरु वक्ताका रुपमा रहने कांग्रेस केन्द्रीय कार्यालयका मुख्य सचिव पौडेलले जानकारी दिए ।

बीपी कोइरालाको जन्मजयन्ती भदौ २४ गते पर्दछ । कांग्रेसले बीपी जयन्ती भौतिक दुरी कायम गरेर, मास्क प्रयोग गरेर वा भर्चुअल विधिबाट मनाउन जिल्ला र विदेशस्थित सम्पर्क समितिलाई एक साताअघि नै परिपत्र गरिसकेको छ ।