भ्रष्ट सरकारकै कारण कोरोना भयावह बन्यो : महामन्त्री पाण्डेय

२३ भदौ, काठमाडौं । नेपाल विद्यार्थी संघ (नेविसंघ)का महामन्त्री युवराज पाण्डेयले सरकारको निरीहताका कारण कोरोना संक्रमण भयावह भएको बताएका छन् । प्रधानमन्त्री केपी शर्मा ओली र मन्त्रीहरुको गैरजिम्मेवारपनका कारण कोरोना महामारी भयावह हुन थालेको उनको भनाई छ ।

नेपाल बहससँगको कुराकानीमा महामन्त्री पाण्डेयले लामो समयदेखि किसान मल नपाएर पिरोलिएका बेला कृषिमन्त्री निन्द्राबाट भर्खर व्युझेजस्तो देखिएका बताएका हुन् । किसानलाई मल दिन नसक्ने सरकारले कृषि मल उत्पादन गर्ने कारखाना खोल्ने सम्भाव्यता अध्ययनमा जुटेको नाटक गर्न व्यस्त रहेको पनि महामन्त्री पाण्डेयको भनाई छ ।

यस्तै तीन बर्षदेखि रोकिएको कृषि योग्य जमीन कित्ताकाट गर्न नपाइने निर्णय सरकारले उल्टाएर माफियालाई उपहार दिएको पनि आरोप लगाए । कृषियोग्य जमीनको संरक्षण र उत्पादकत्व वृद्धि गर्नुपर्नेमा ठोस अग्रसरता लिनुपर्ने भुमि व्यवस्था मन्त्रीले सहजै जमीन कित्ताकाट गर्न पाईने निर्णय गर्नु माफियाको चंगुलमा सरकार रहेको महामन्त्री पाण्डेयको भनाई छ ।

कोरोनाका कारण बालबालिकाले पढ्न नपाएका बेला शिक्षामन्त्री बेखबर रहेको र विद्यार्थीको पढ्न पाउने अधिकारलाई कुण्ठित गरेको पाण्डेयले बताए । स्वास्थ्य क्षेत्र, शिक्षा, कृषि, रोजगारी लगायतका क्षेत्रमा अभाव, महंगी र अनियमितता बढ्दा सरकार कानमा तेल हालेर बसेको पनि पाण्डेयले आरोप लगाए । जनताको समस्या सुन्नेभन्दा सरकार आफ्नो दुनो सोझाउनेतर्फ मात्रै केन्द्रित रहेको पनि महामन्त्री पाण्डेयको भनाई छ ।