स्थायी कमिटी बैठकबाट बाहिरिए ओली

२६ भदौ, काठमाडौं । बालुवाटारमा केहीबेर अघिदेखि शुरु भएको नेकपाको स्थायी कमिटी बैठकबाट प्रधानमन्त्री केपी शर्मा ओली बाहिरिएका छन् । झण्डै १० मीनेट मात्रै बैठकमा बसेका प्रधानमन्त्री ओली केहीबेरअघि बाहिरिएका बालुवाटारबाट एक नेताले जानकारी दिए ।

उनका अनुसार आजको बैठकमा पनि प्रधानमन्त्री ओली बस्ने सम्भावना कम छ । बेलूकी फेरि एकपटक बैठकमा उपस्थित हुने जानकारी गराएर ओली बाहिरिएका हुन् । बैठकको अध्यक्षता कार्यकारी अध्यक्षको हैसियतले प्रचण्डले गरिरहेका छन् ।

ओलीसँग कार्यकारी अध्यक्षको सहमति गरेका प्रचण्ड आजको बैठकमा बीचको कूर्सीमा बसेका छन् । प्रचण्डको दाहिनेतिर बरिष्ठ नेता माधव कुमार नेपाल बसेका छन् भने बायातिर ओली बसेका थिए ।

सायद कार्यकारी अधिकार नपाएकाले ओली बैठकमा नबसेको अनुमान गरिएको छ । यसले ओली र प्रचण्डबीचको सहमतिलाई फेरि पनि धोका हुने संकेत देखिएको छ ।