बाह्रबिसे पहिरोमा ७ जनाको शव भेटियो

२८ भदौ, सिन्धुपाल्चोक । बाह्रबिसेको भुम्थाङ पहिरोमा ७ जनाको शव भेटिएको छ । बाह्रबिसे नगरपालिकाका मेयर निमफुन्जो शेर्पाका अनुसार पहिरोमा बेपत्ता परेकामध्ये अहिलेसम्म ७ जनाको शव भेटिएको हो ।

पहिरोमा अझै २४ जना हराईरहेका छन् । नाकचुच्चे भन्ने ठाउँबाट पहिरोमा हराएकाको खोजी भइरहेको छ । नाकचुच्चेबाट बर्खर्कसम्म गएको पहिरोले दर्जनौ घर पुरेको छ ।

पहिरोमा जिउँदै भेटिएका ३ जनालाई भने उपचारका लागि अस्पताल पठाइएको छ । उनीहरुलाई उपचारका लागि काठमाडौं पठाइएको छ । प्रहरीले भेटिएका शवहरूको पहिचान गरिरहेको छ। पहिरोस्थलमा केहीबेरअघि सभामुख अग्नि सापकोटा पुगेका छन् ।