कोरोनाबाट ७६ वर्षीया महिलाको निधन

२८ भदौ, दमौली । तनहुँको आँबुखैरेनी गाउँपालिकाकी एक महिलाको कोरोना संक्रमणबाट निधन भएको छ । आँबुखैरेनी–४ निवासी ७६ वर्षीया महिलाको यही भदौ २४ गते काठमाडौंस्थित मनमोहन कार्डियोभास्कुलर थोरासिक एण्ड टा्रन्सप्लान्ट सेन्टरमा उपचारका क्रममा निधन भएको गण्डकी प्रदेश स्वास्थ्य निर्देशनालयले आज जनाएको छ ।

ती महिलामा मुटुसम्बन्धी समस्या थियो । भदौ २० गते अस्पताल भर्ना भएकी उनीलाई भदौ २३ गते कोरोना पुष्टि भएको थियो । उपचारका लागि चितवन पुगे पनि स्वास्थ्यमा सुधार नभएपछि उनलाई काठमाडौं लगिएको जनाइएको छ । यससँगै तनहुँमा कोरोना संक्रमणबाट निधन हुनेको सङ्ख्या चार पुगेको छ ।

यसअघि व्यास नगरपालिका–१ की ५० वर्षीया महिलाको पोखरा, व्यास–२ की २० वर्षीया युवतीको काठमाडौं र म्याग्दे गाउँपालिका–१ की ९६ वर्षीया महिलाको काठमाडौंमा निधन भएको थियो ।