रुपन्देहीमा कपिलवस्तुका दुई संक्रमितको मृत्यु

२९ भदौ, बुटवल । रुपन्देहीमा कविलवस्तुका दुई जनाको कोरोना संक्रमणबाट मृत्यु भएको छ । लुम्बिनी प्रादेशिक अस्पतालको कोरोना विशेष अस्पताल बुटवल र भीम अस्पताल भैरहवामा उपचाररत् कपिलवस्तु शिवराज नगरपालिका वडा नम्बर ५ का २ जनाको मृत्यु भएको हो।

भीम अस्पतालमा उपचाररत शिवराज ५ का ५८ वर्षीय पुरुष र वडा नम्बर ५ कै ४७ वर्षीय महिलाको बुटवलमा मृत्यु भएको हो । यही भदौ २३ गते स्वास्थ्यमा समस्या देखिएपछि भीम अस्पतालको आइसोलेशनमा उपचारका लागि भर्ना भएका पुरुषको स्वास्थ्य गम्भीर बन्दै गएपछि ३ दिनअघि आइसीयूमा राखेर उपचार गरिदैं आइएको थियो।

आइतबार राती साढे १० बजे उनको उपचारकै क्रममा मृत्यु भएको हो । यस्तै कपिलवस्तु शिवराज नगरपालिका वडा नं ५ कै ४७ वर्षीया महिलाको उपचारका क्रममा सोमबार बिहान साढे ४ बजे मृत्यु भएको हो ।

भदौ २१ गते कोरोना संक्रमण पुष्टि भएपछि उनी अस्पताल भर्ना भएकी थिइन्। मिर्गौलाको समेत समस्या रहेकी उनले नियमित डायलाईसिस् गराउँदै आएकी थिइन्। पछिल्लो समय बुटवलमा कोरोना मृत्तकको संख्या दैनिक बढ्दै गएको छ ।