रक्सीले मातेर बुवाले गरे आफ्नै छोराको हत्या

३० भदौ, वीरगञ्ज । पर्साको सिरिसियामा आफ्नै बुवाले छोराको हत्या गरेका छन् । पर्साको पोखरिया नगरपालिका ६ सीरिसियामा सोमबार राति बुवाले छुरा प्रहार गर्दा छोराको मृत्यु भएको हो। ७० वर्षका वृद्ध लक्ष्मी साहले रक्सीको नशामा छुरा प्रहार गर्दा उनका ३५ वर्षका छोरा माधो साह गम्भीर घाइते भएका थिए।

छुरा प्रहारबाट घाइते भएका साहलाई उपचारको लागि पोखरिया अस्पतालमा लगिएको थियो। त्यहाँ उपचार सम्भव नभए पछि थप उपचारको लागि वीरगञ्ज ल्याउने क्रममा साहको बाटोमा नै ज्यान गएको इलाका प्रहरी कार्यालय पोखरियाका प्रहरी निरीक्षक चन्द्र सिंहले जानकारी दिए। छोराको हत्या गर्ने बुवालाई पक्राउ गरी अनुसन्धान शुरु गरिएको प्रहरीले जनाएको छ ।