पसल खोल्न पाउनुपर्ने माग गर्दै सैलुन व्यवसायीहरुको प्रदर्शन

३० भदौ, काठमाडौं । उपत्यकाका सैलुन व्यवसायीहरुले काठमाडौंमा फेरि प्रदर्शन गरेका छन् । ‘संयुक्त नाइ संघर्ष समिति’को ब्यानरमा ललितपुरको पाटनदेखि काठमाडौंको माइतीघर मण्डलासम्म मंगलबार बिहान उनीहरुले प्रदर्शन गरेका हुन् ।

देशभरका सबै सैलुन र ब्युटी पार्लर खोल्न पाउनु पर्ने उनीहरुको माग छ । नाइ श्रमिकहरुलाई लकडाउन अवधिभरको राहतको व्यवस्था गर्नुपर्ने, बैंकको ब्याजदर मिनाहा हुनुपर्ने, पसल तथा कोठा भाडा मिनाहा हुनुपर्ने, नाई श्रमिकहरुलाई निःशुल्क पीपीई सेट दिनुपर्ने, नाई श्रमिकहरुको ५० लाख बराबरको जीवन बीमा गरिदिनुपर्ने माग पनि उनीहरुले राखेका छन् ।

यसअघि पनि सैलुन व्यवसायीले सैलुन व्यवसाय खोल्नुपर्ने माग गर्दै काठमाडौंमा प्रदर्शन गरेका थिए ।