निजी विद्यालयका शिक्षकलाई तलब दिन संयुक्त विद्यार्थी संगठनको माग

३० भदौ, काठमाण्डौ । संयुक्त विद्यार्थी सङ्गठनले अनलाईन शिक्षाका नाममा शूल्क लिने निजी विद्यालयलाई कारवाही गर्न सरकारसँग माग गरेको छ । मंगलबार काठमाडौंमा बसेको संयुक्त विद्यार्थी संगठनले १२ बुँदे माग सार्वजनिक गर्दै शूल्कका नाममा अभिभावकलाई ठगी गर्ने निजी विद्यालयलाई कारबाही गर्न माग गरेको हो । साथै विद्यार्थी संगठनले आवश्यक स्वास्थ्य सतर्कता अपनाउँदै विद्यालय, क्याम्पस र विश्वविद्यालयको पठनपाठन सञ्चालनको वातावरण तयार गर्न सरकारसँग आग्रह समेत गरेका छन् ।

आठ महिनापछि मङ्गलबार बसेको सङ्गठनको बैठकले कोरोनाको कारण अलपत्र परेका विद्यार्थी, गरिब तथा विपन्न मजदुरको कोठा भाडा र राहत प्याकेज घोषणा गर्न, निजी विद्यालयमा कार्यरत शिक्षक तथा कर्मचारीहरुको तलबको व्यवस्था गर्न पनि माग गरेको छ ।

यसैगरी कोरोना भाइरस नियन्त्रणको लागि औषधि खरिद, क्वारेन्टाइन र अन्य व्यवस्थापनमा भएको भनिएको अनियमितता र भ्रष्टाचारको छानबिन गरी अनियमितता र भ्रष्टाचारमा सङ्गठनहरुलाई कारबाही गर्न तथा महँगी, कालोबजारी नियन्त्रण गर्न पनि विद्यार्थी सङ्गठनले माग गरेका छन् ।