यात्रुलाई मार नपार्ने, जहाजभरी यात्रु चढाउन पाउनुपर्ने व्यवसायीको माग

३१ भदौ, काठमाडौं । वायुसेवा सञ्चालकले महंगीमा यात्रुलाई मार पारेर उडान भर्न नसकिने जनाएका छन् । सरकारले भनेअनुसार ५० प्रतिशत मात्र यात्रु राखेर उडान गर्न नसकिने तर अहिलेकै भाडादरमा जहाजभरी यात्रु राखेर उडान गर्न दिनुपर्ने माग अघि सारेका हुन् ।

बुधबार संस्कृति, पर्यटन तथा नागरिक उड्डयन मन्त्रालयमा भएको छलफलमा व्यवसायीले १ असोजदेखि उडान खुला गर्ने निर्णय सार्वजनिक भएपनि सोही दिन जहाज उड्न नसक्ने र ५० प्रतिशत यात्रु राखेर समेत उडान सम्भव नभएको बताएका हुन् ।

मन्त्रालयले भने यसअघि तोकिएको सबैभन्दा माथिल्लो दरमा भाडा लिन पाउने गरी सहमति गर्न प्रस्ताव गरेको छ । तर, व्यवसायी भने भर्खरै महामारीका कारण घरभित्रै थुनिएर बसेका यात्रुले मँहगो भाडा तिरेर यात्रा गर्न नसक्ने भन्दै असहमति जनाएका हुन् । उनीहरुले अहिलेकै भाडादरमा यात्रुलाई सेवा दिन पाउनुपर्ने माग गरेका छन् । तर यसमा मन्त्रालयले सहमति जनाइसकेको छैन् ।