मन्त्रीको भागबण्डा मिलाउन पर्सी नेकपाको सचिवालय बैठक डाकियो

३१ भदौ, काठमाडौं । आन्तरिक विवाद मत्थर भएपछि सोही सहमतिअनुसार मन्त्रीको भागबण्डा मिलाउन सत्तारुढ नेकपाले सचिवालय बैठक बोलाएको छ । पर्सी शुक्रबार पेरिसडाँडामा नेकपाको सचिवालय बैठक डाकिएको हो ।

बैठकमा मन्त्रिपरिषद पुनर्गठनबारे छलफल हुनेछ । नेकपा अध्यक्ष तथा प्रधानमन्त्री केपी शर्मा ओली र अर्का अध्यक्ष पुष्पकमल दाहाल प्रचण्डको सहमतिअनुसार मन्त्रिपरिषदमा मन्त्री हेरफेर गर्ने चर्चा छ । भागबण्डा मिलाउन प्रदेशस्तरमा पनि मन्त्री हेरफेर गर्ने तयारी नेताहरुको छ ।

आन्तरिक विवाद मिलाउन मन्त्री हेरफेरमा भागबण्डा मिलाउने सुझाव नेकपाको कार्यदलले दिएको थियो । चर्चा यतिसम्म थियो कि, कार्यदलमा रहेका सबै ६ जना नेता नै मन्त्री बन्ने छन् । त्यसमा असन्तुष्ट रहेका ओलीले मन्त्रिपरिषद बैठकमै तत्काल कोही मन्त्री नहट्ने भन्दै ढुक्क भएर काम गर्न निर्देशन दिएका थिए ।

तर खाली रहेका मन्त्रालयमा पनि मन्त्री नियुक्त गर्नुपर्ने भएपछि नेकपाको सचिवालयमा यो विषय एजेन्डा बनेको हो ।