आइसोलेसनमा देउवा, बालुवाटार बैठक स्थगित

१ असोज, काठमाडौं । नेपाली कांग्रेसका सभापति शेरबहादुर देउवा कोरोना भाइरसको कन्ट्याक्ट ट्रेसिङमा परेका छन् । निजी सचिवालयका एक जनालाई कोरोना संक्रमण पुष्टि भएपछि देउवा ट्रेसिङमा परेका हुन् । कोरोनाको जोखिममा परेपछि देउवा बुढानिलकण्ठस्थित होम आइसोलेसनमै छन् ।

कन्ट्याक्ट ट्रेसिङ अन्तर्गत सचिवालयका अरु चार जनाको स्वाब परीक्षण गर्दा चारै जनाको रिर्पोट नेगेटिभ आएको छ । सभापति देउवाको भने भोलि मात्रै स्वाब संकलन गरेर परीक्षण गर्ने तयारी छ ।

देउवा कन्ट्याक्ट ट्रेसिङमा परेपछि बालुवाटार बैठक स्थगित गरिएको छ । संवैधानिक आयोगमा पदीय भागबण्डा गर्न आज देउवा, प्रधानमन्त्री ओली र नेकपाका अध्यक्ष प्रचण्डबीच छलफलको तयारी थियो । तर प्रमुख प्रतिपक्षी दलका नेता अनुपस्थित हुने भएपछि बैठक स्थगित गरिएको हो ।