नेताहरुबीच सहमति नजुट्दा सचिवालय बैठक स्थगित

२ असोज, काठमाडौं । सत्तारुढ नेपाल कम्युनिष्ट पार्टीभित्रको आन्तरिक द्वन्द्व व्यवस्थापन गर्ने क्रममा नेताहरुबीच सत्ता बाँडफाँडको सहमति भएबमोजिम प्रक्रिया अगाडि बढाउन आज बिहानका लागि तय गरिएको सचिवालय बैठक एकाएक स्थगित भयो ।

सहमतिको खाका तयार भइसकेपछि पनि पार्टी नेताहरु एकअर्कालाई विश्वास गर्ने अवस्थामा नपुगेकाले नै बैठक स्थगित भएको बुझिएको छ ।
प्रधानमन्त्री केपी ओली र अर्का अध्यक्ष पुष्पकमल दाहाल प्रचण्डबीच अझै विवाद मिल्न नसकेकोले नै आजको सचिवालय बैठक रोकिएको हो । बिहान साढे ९ बजे सचिवालय सदस्यहरुको मोबाइलमा घण्टी गयो । महासचिव विष्णु पौडेलले आजका लागि तय गरिएको सचिवालय बैठक आइतबारसम्मका लागि स्थगित भएको जानकारी दिए ।

पार्टी प्रवक्तासमेत रहेका सचिवालय सदस्य नारायणकाजी श्रेष्ठले अन्तिम अवस्थामा आएर बैठक स्थगित गर्ने प्रवृत्ति गलत भएको टिप्पणी गरे ।
हरेक बैठक अन्तिम समयमा आएर स्थगित भएको सूचना दिने बढो अनौठो तरिका रहेछ नेताहरुको – उनले भने । सचिवालय बैठकको अजेण्डा नै पार्टीमा भएको सहमति अनुसार मन्त्रिपरिषदमा पुनर्गठन गर्ने भन्ने थियो ।

दुई अध्यक्षबीच भएको छलफलमा पुनर्गठनको मोडालिटीबारे सहमति जुटिसकेको छैन । प्रधानमन्त्रीसमेत रहेका अध्यक्ष केपी ओली र अर्का कार्यकारी अध्यक्ष पुष्पकमल दाहाल प्रचण्डले यसबारे पटकपटक छलफल गरेपनि सहमति बनेको छैन ।  त्यसैले आजको लागि तय गरिएको सचिवालय बैठक पर्सिसम्मका लागि स्थगित भएको हो– बालुवाटार निकट स्रोतले भन्यो ।

ओली अहिले रहेका मन्त्रीहरुलाई यथावत् राखी खाली मन्त्रालयमा प्रभावशाली सदस्यलाई थप्न चाहन्छन् भने प्रचण्ड र माधवकुमार नेपाल भने एउटा मोडालिटी नै बनाएर ठूलै फेरबदल गर्न चाहन्छन् । यही विषयमा दुई अध्यक्षबीच सहमति बनिसकेको छैन, त्यसैले बैठक स्थगित गरिएको हो – स्रोतको भनाई छ । तर ओली र प्रचण्डबीच शीर्ष नेताहरुलाई मन्त्रिमण्डलमा सहभागी गराउने विषयमा नै मत बाझिएको बुझिएको छ ।

प्रधानमन्त्री ओली हिजो मात्रै संघीय संसदको सदस्य बनेका पार्टी उपाध्यक्ष बामदेव गौतम र प्रवक्ता नारायणकाजी श्रेष्ठलाई समेत मन्त्रिमण्डलमा ल्याउन चाहन्छन् । तर मन्त्रालयबारे भने उनी खुलेका थिएनन् । तर प्रचण्ड–माधव समूहले भने ओलीलाई गाल्ने दाउमा देखिए । गौतमलाई अर्थ र श्रेष्ठलाई परराष्ट्र मन्त्रालयको जिम्मेवारी दिन लबिङ गर्न थाले । प्रचण्डले ओलीसँगको कुराकानीमा यही आशय प्रकट गरे ।

त्यसले ओलीलाई झस्कायो । उनी गौतम र श्रेष्ठलाई मन्त्री बनाउन आफैं चाहन्थे । तर यहाँ पनि प्रचण्ड र नेपालले खेलेको अनुभव ओलीले गरे ।
आजको सचिवालय बैठक अगावै एउटा सहमतिको खाका लिएर जाने तयारीमा ओली थिए । त्यसका लागि धेरैपटक छलफल पनि गरे । तर सहमति जुटेन । प्रचण्ड नै सहमति जुटाउनेतिर लागेनन् । किनभने सचिवालय बैठकमा नेपालसँग मिलेर गौतमलाई अर्थ र श्रेष्ठलाई परराष्ट्र मन्त्री बनाउने प्रस्ताव पास गर्ने दाउमा प्रचण्ड थिए ।

यसको सुईको पाएका ओलीले हिजो साँझसम्म केही भनेनन् । सहमति बेगर बैठकमा बस्दा प्रस्ताव पारित हुने अनुमान उनले गरे । त्यसैले बिहानै महासचिवमार्फत सचिवालय बैठक नै स्थगित भएको सूचना सम्प्रेषण गरियो । नेकपाको सबैभन्दा माथिल्लो निकायका रुपमा रहेको सचिवालयमा बहुमत कायम राख्न नेताहरुबीच होडबाजी नै चल्ने गरेको छ । ओलीले प्रचण्डको साथमा बिगतमा नेपाल समूहलाई तह लगाएकोमा पछिल्लो समय भने परिस्थिति बदलिएको छ । प्रचण्ड र नेपालबीच हिमचिम बढेपछि सचिवालयमा ओली अल्पमतमा परेका हुन् । तर बेलाबेला बामदेव गौतमको अस्थिरताका कारण प्रचण्ड– नेपाल समूह कमजोर देखिने गरेका छन् ।

सचिवालय सदस्यहरुमध्ये बामदेव र श्रेष्ठ मात्रै संघीय संसदमा थिएनन् । ओलीलगायत प्रचण्ड, नेपाल, झलनाथ खनाल, विष्णु पौडेल र ईश्वर पोखरेल प्रतिनिधिसभामा निर्वाचित भएका हुन् भने रामबहादुर थापा राष्ट्रियसभा सदस्य थिए । गौतम र श्रेष्ठ भने प्रतिनिधिसभामा पराजित भएकाले संघीय संसदमा प्रतिनिधित्व गर्नबाट बञ्चित थिए । अब भने उनीहरु पनि राष्ट्रियसभामा पुगेका छन् । गौतम र श्रेष्ठलाई साथ लिन सक्दा सचिवालय बैठकमा बहुमत जुट्ने भएकाले दुबै पक्षको रुची उनीहरुलाई रिझाउने रहेको देखिन्छ ।

नेताहरुको स्वार्थ मिल्दा सबै सचिवालय सदस्य संघीय संसदमा पुगेका छन् । उनीहरुको व्यवस्थापन कसरी गर्ने भन्नेमा ओली र प्रचण्डको चासो बढेको छ – नेकपाका एक स्थायी समिति सदस्यले भने । सबैको चाहना पूरा भएको छ, मात्र त्यसलाई कसरी उपयोग गर्ने भन्नेमा नेताहरु अल्झिएका छन्– उनले भने ।

ओलीको चाहना भनेको गौतमलाई अर्थ मन्त्रालय भन्दा अरु नै दिने छ भने श्रेष्ठलाई शिक्षा दिने चाहना रहेको छ । तर प्रचण्ड र नेपालले भने गौतम र श्रेष्ठको साथ पाउन अर्थ र परराष्ट्र दिने प्रस्ताव पारित गराउन लागेका हुन् । यस्तो अवस्था आउँदा प्रधानमन्त्री ओली कमजोर हुने ठानेर नै थप गृहकार्य गर्न खोजिएको हो– बालुवाटार निकट स्रोतको दाबी छ ।

गौतमलाई आफ्नो कित्तामा राख्न प्रचण्ड नेपाल समूहले यस्तो रणनीति अपनाएका हुन्– स्रोत भन्छ । तर प्रधानमन्त्री ओली पनि कमजोर छैनन् । सकेसम्म गौतमलाई आफ्नो कित्तामा ल्याएर मात्रै मन्त्री बनाउने नत्र राष्ट्रियसभामा मात्रै सीमित बनाउने पक्षमा ओली रहेका छन् । प्रचण्ड र नेपालले फेरिपनि खेल्न थाल्ने हो भने मन्त्रिमण्डल पुनर्गठन अझै लम्बिने छ– उनले भने । गौतम आफ्नो कित्तामा आउने निश्चित नभएसम्म ओलीले उनलाई मन्त्री बनाउने सम्भावना नरहेको पनि उनको दाबी छ ।

गौतमको अस्थिर स्वभावका कारण ओली अझै आश्वस्त भइसकेका छैनन्, त्यसमाथि प्रचण्ड र नेपालले उनको व्यक्तिगत मनोकाँक्षा बढाउने काम गर्न थाले भने अहिलेलाई पुनर्गठन नहुनपनि सक्ने ती नेताले संकेत गरे । तर बालुवाटार निकट स्रोत भन्छ– प्रधानमन्त्री ओलीले गौतमलाई जसरी भएपनि फकाउने छन्, अर्थमन्त्रालय बाहेक जुनसुकै मन्त्रालय दिन उनी तयार भएकाले सबै मिल्छ ।

पहिलोपटक पूर्व माओवादी केन्द्रको मुख्यालय रहेको पेरिसडाँडास्थित पार्टी कार्यालयमा सचिवालय बैठक डाकिएको थियो । पार्टीको कार्यकारी अध्यक्ष भएको सन्देश प्रवाह गर्नकै लागि प्रचण्डले पेरिसडाँडामा बैठक डाकेका थिए ।