नेकपामा कुन कुन मन्त्रीलाई हटाउने भन्नेमा ओली र प्रचण्डबीच विवाद

४ असोज, काठमाडौं । सरकारका काम कारबाही बारेमा गम्भीर छलफल भएको नेकपाको सचिवालय बैठकमा कुन कुन मन्त्रीलाई हटाउने भन्नेमा विवाद भएको छ । खासगरी देखिने भन्दा नदेखिने गरी प्रधानमन्त्री केपी शर्मा ओली र अध्यक्ष प्रचण्डबीच विवाद देखिएको हो ।

प्रधानमन्त्री ओली पहिलेदेखि मन्त्री भएकाहरु समेतलाई हटाउन तयार देखिएका छन् । यसबाट प्रचण्ड भने झस्किएका छन् । प्रचण्डकी बुहारी बिना मगर समेत मन्त्री रहेकाले उनको कुर्सी जोगाउन प्रचण्ड ओलीको प्रस्तावबाट तर्सिएकाे नेकपा नेताहरुको भनाई छ ।

अरु धेरै मन्त्रीलाई बिदाई गर्न प्रचण्ड तयार भएपनि बिनाका विषयमा भने तयार भइनसकेको नेकपाका नेताहरुको भनाई छ । मेलम्ची खानेपानी आयोजनामा भएको अनियमितताका कारण बिना अलोचित छन् । यसपटक उनलाई हटाउनैपर्ने दवाव पनि तीब्र छ । तर ओली भने बिनालाई हटाउन तयार देखिएका छैनन् ।

ओलीले भने शुरुदेखि मन्त्री बनेका गृहमन्त्री रामबहादुर थापा बादल, रक्षामन्त्री ईश्वर पोखरेलसम्मलाई हटाउन तयार रहेको स्पष्ट प्रतिक्रिया बैठकमा दिएका छन् । प्रचण्ड भने बिना मगरलाई मन्त्री बनाई राख्नुपर्नेमा अडान लिइरहेका छन् ।

प्रचण्डले अडान लिन थालेपछि ओली पनि रक्षामन्त्री ईश्वर पोखरेल, स्वास्थ्यमन्त्री भानुभक्त ढकाल लगायतलाई कायमै राख्नुपर्ने वा हटाउन नहुनेमा अडान लिने देखिन्छ । जबकी दुवै जनालाई हटाउनुपर्ने दबाब नेकपाभित्र र बाहिर बढ्दै गएको छ ।

यसले पनि मन्त्रीमण्डल तत्कालै फेर्ने तर क कसलाई मन्त्री बनाउने र हटाउने भन्नेमा ओली प्रचण्डबीच विवाद देखिएको हो । यसबारेमा भोलि फेरि पेरिसडाँडामा बस्ने सचिवालय बैठकमा छलफल हुने नेताहरुले बताएका छन् ।