पोखरीमा डुबेर आमा छोरीसहित तीन जनाको मृत्यु

५ असोज, विराटनगर । मोरङमा पोखरीमा डुबेर दुई छोरी र आमाको मृत्यु भएको छ । ग्रामथान गाउँपालिका–४ बनसखण्डीकी ३५ वर्षीय सीता अधिकारी, उनका १३ र ९ वर्षीया छोरीहरुको मृत्यु भएको हो ।

१३ वर्षीया छोरी पबित्रा र ९ वर्षीया कृतिका पोखरीमा डुबेपछि उद्धार गर्न गएकी सीताको पनि मृत्यु भएको प्रहरीले जनाएको छ । आइतबार दिउँसो माछा पाल्ने पोखरीमा सीताका दुई छोरी पसेका थिए । पोखरीको डिलमा कपडा खोलेर दुई छोरी पसेको देखिएको प्रहरीको दाबी छ । गहिरो पोखरीमा दुई छोरीहरु डुबेपछि उद्धारका लागि आमा गएकी थिइन् ।

तर छोरीको उद्धारका लागि गएकी उनकी आमाको पनि मृत्यु भएको हो । पति ९ बर्षदेखि सम्पर्कविहिन भएपछि सीता माइतमा बस्दै आएकी थिइन् ।