आज नेकपाको सचिवालय बैठक बस्दै

६ असोज, काठमाडौं । सत्तारूढ नेपाल कम्युनिष्ट पार्टी ‘नेकपा’ को सचिवालय बैठक आज बस्दै छ । प्रधानमन्त्री निवास बालुवाटरमा मध्यान्न साढे १२ बजे प्रधानमन्त्रीको सरकारी निवास बालुवाटारमा बैठक बस्ने तय भएको हाे।

अघिल्लो बैठक तत्कालीन माओवादीको पेरिसडाँडास्थित पार्टी कार्यालयमा बसेको भए पनि आजको बैठक भने प्रधानमन्त्रीको सरकारी निवास बालुवाटारमै बस्ने भएको हो।

आइतबारको बैठकमा पार्टीलाई सशक्त बनाउन आयस्रोत नभएका केन्द्रीय सदस्यलाई जीवीकोपार्जनमा सहज हुने गरी मासिक रकम दिने विषयसमेत छलफलमा आएपनि यसबारे ठोस निर्णय भने भएको छैन ।

आजको बैठकमा भने मन्त्रिपरिषद पुनर्गठनका विषयमा नभएर बाँकी  एजेन्डामा छलफल गर्ने कार्यसूची रहेको छ । संवैधानिक निकायका रिक्त पदमा नियुक्ति, एकताका बाँकी कामलाई पूर्णता, महाधिवेशनको तयारीका लागि साङ्गठिक काम र योजना बैठकको एजेण्डा छ ।

यसैगरी कोरोना महामारीका समयमा सङ्घीय सांसद्ले बैठक भत्ता नलिने र केन्द्रीय सदस्यका लागि आर्थिक सहयोग गर्ने विषय पनि कार्यसूचीमा राखिएको छ ।